މަގުހެދުމުގެ މަޝްރޫޢު އަވާމެންދުރަކަށް ވިޔަނުދިނުމަށް އަތޮޅު ކައުންސިލްގެ ރައީސް ގޮވާލައްވައިފި

މަގުހެދުމުގެ މަޝްރޫއު އަވާމެންދުރަކަށް ވިޔަނުދިނުމަށް އަތޮޅު ކައުންސިލްގެ ރައީސް ހުސައިން ރަޝީދު  ގޮވާލައްވައިފި އެވެ.

ހުސައިން ރަޝީދު މިކަމަށް ގޮވާލެއްވީ އިއްޔެ ކުޅުދުއްފުށީ އަމީނީމަގު ހެދުމުގެ 2 ވަނަ ފިޔަވަހި ފެށުމުގެ ގޮތުން އިއްޔެ އޮތް ރަސްމިއްޔާތުގައި ވާހަކަފުޅު ދައްކަވަމުންނެވެ.

“މިއަތޮޅަކީ ސަރުކާރުން ގިނަ މަޝްރޫއުތަކެއް ފަށާ އަތޮޅެއް. އެހެން ނަމަވެސް ކޮންމެ ފަހަރަކުވެސް ދަނީ  އަވާމެންދުރަކަށް ބަދަލުވެގެން.” ހުސައިން ރަޝިދު ވިދާޅުވި އެވެ.

އަތޮޅު ކައުންސިލް އިންތިހާބު ވިފަހުން ހަތަރު ވަނައަށް ރައީސް ކަން ކުރައްވާ ހުސެއިން ރަޝީދު ވިދާޅުވީ ހދ. އަތޮޅަކީ މުޅި ރާއްޖެއިން ވެސް 2 ވަނައަށް އެންމެ އާބާދީ ބޮޑު އަތޮޅުކަން ފާހަގަ ކުރައްވާ ހދ އަތޮޅުގައި ރިސޯޓެއް ނެތް ކަމަށް ވިދާޅުވިއެވެ. އަދި ރިސޯޓުތައް ހެދުމަށް ބޮޑެތި ވިޔަފާރިވެރިންނާއި ހަވާލު ކުރެވިފައި ހުރި ކަމުގައި ވިޔަސް، ރިސޯޓްތައް ތަރައްގީ ކުރެވޭތަން ނުފެންނަކަމަށް ވިދާޅުވި އެވެ.

ކުޅުދުއްފުއްޓަކީ ބޮޑުރަށަކަށް ވުމުން އަލިފާނުގެ ހާދިސާއެއް ދިމާވެއްޖެ ނަމަ ފެން ފޯރުކުރުމަށް އުނދަގޫ ތަކެއް ދިމާވާ ކަމަށާއި،  ރަށުގެ އެކި ހިސާބުތަކުގައި ފެން ނެގޭނެ އިންތިޒާމް ހަމަޖައްސައި ދެއްވުމަށް ހުސައިން ރަޝީދު ރައީސްގެ އަރިހުން އެދިލެއްވި އެވެ.