ހޮސްޕިޓަލުގައި ހޭނައްތާ ޑޮކްޓަރެއް ނެތިގެން މާބަނޑު އަންހެނަކު އޮޕަރޭޝަން ނުކުރެވިފައި

ކުޅުދުއްފުށީ ރީޖަނަލް ހޮސްޕިޓަލްގައި ހޭނައްތާ ޑޮކްޓަރެއް ނެތުމުގެ ސަބަބުން މާބަނޑު މީހެއް އޮޕަރޭޝަން ނުކުރެވިފައި އޮތް ކަމަށް ހަބަރު ލިބިއްޖެއެވެ.

ހޭނައްތާ ޑޮކްޓަރެއް ނެތިގެން އޮޕަރޭޝަން ނުކުރެވިފައިވާ ވަނީ ކުޅުދުއްފުށީ އުމުރުން 30 އަހަރުގެ އަންހެނެކެވެ.

އޭނާގެ އާއިލާއިން މައުލޫމާތު ދޭގޮތުގައި މިއަދު ހެނދުނު އެ އަންހެން މީހާ ހޮސްޕިޓަލަށް ގެންދިޔައީ ފެންފައިބާތީ އެވެ. އަދި އެ އަންހެން މީހާއަކީ ޑައެބެޓިކްސް ޕޭޝަންޓެއް ކަމަށްވެސް އާއިލާއިން ހާމަކުރެއެވެ.

“ހެނދުނު 8 ޖަހާ ކަންހާއިރު ހޮސްޕިޓަލަށް ގެންދިޔައީ. ފެންފައިބާތީ. ހޭނައްތާ ޑޮކްޓަރެއް ނެތިގެން އޮޕަރޭޝަން ނުކުރެވިފަ މިތިބީ. 4 ޖަހާއިރު ޑޮކްޓަރެއް މާލެއިން އައީމަ އޮޕަރޭޝަން ކުރެވޭނީ.” އޭނާގެ ފިރިމީހާ މިނޫހަށް މައުލޫމާތު ދެމުން ބުންޏެވެ.

މިކަމާ ގުޅިގެން ކުޅުދުއްފުށީ ރީޖަނަލް ހޮސްޕިޓަލްގެ މެނޭޖަރ އިބްރާހިމް ވަހީދު ވިދާޅުވީ  ހޭނައްތާ ޑަކްޓަރު ހުރީ ޗުއްޓީގައި ކަމަށާއި، އެހެން ނަމަވެސް މިއަދު ޗުއްޓީ ނިންމާލުމަށްފަހު ކުޅުދުއްފުއްޓަށް އަންނާނެ ކަމަށެވެ.

“މިހާރު ޗުއްޓީގަ ހުރީ. އެކަމަކު މިއަދު 3، ނޫނީ 4 ޖަހާއިރު ކުޅުދުއްފުއްޓަށް އަންނާނެ” ވަހީދު ވިދާޅުވިއެވެ.

މިވަގުތު އެންމެ އުތުރުގެ ތިން އަތޮޅުގެ ހޮސްޕިޓަލުތަކުގައި ހުރީ އެންމެ ހޭނައްތާ ޑޮކްޓަރެކެވެ.