އަދާލަތު ޕާޓީއަށް މެމްބަރުން އިތުރު ކުރުމުގެ ގޮތުން ކުޅުދުއްފުށީގައި ޖަލްސާއެއް ބާއްވައިފި

– ކުޅުދުއްފުށިން ފުރައިގެން ދާނީ 1000 ފޯމު ފުރައިގެން: ޝަހީމް

އަދާލަތު ޕާޓީއަށް މެމްބަރުން އިތުރު ކުރުމުގެ ގޮތުން ރޭ ކުޅުދުއްފުށީ ގައި ޖަލްސާ އެއް ބާއްވައިފި އެވެ.

“ދީނާއި ޤައުމަށްޓަކައި އަޅުގަނޑުގެ ސޮއި އަދާލަތަށް” މިނަމުގައި ރޭ އަފީފުއްދީން ސްކޫލް ހޯލުގައި ބޭއްވި ޖަލްސާގައި ވާހަކަފުޅު ދައްކަވަމުން އަދާލަތު ޕާޓީގެ އިސްތަރުޖަމާނު އަދި މިނިސްޓަރ އޮފް އިސްލާމިކް އެފެއާޒް މުހައްމަދު ޝަހީމް ވިދާޅުވީ ކުޅުދުއްފުއްޓަށް އައީ 1000 ފޯމު ހިފައިގެން ކަމަށާއި އިރާދަކުރެއްވިއްޔާ ފުރައިގެން ދާނީ އެއަދަދަށް ފޯމު ފުރުމަށް ފަހު ކަމަށެވެ. އަދި މިއަދު ރާއްޖޭގެ ރައްޔިތުންނަށް އޮތް އެންމެ ރަނގަޅު ގޮތަކީ އަދާލަތު ޕާޓީއާ ގުޅުން ކަމަށް ވެސް ޝަހީމް ވިދާޅުވި އެވެ.

ޝަހީމް ވިދާޅުވީ ރާއްޖޭގައި އިސްލާމީ އިގްތިޞާދެއް ބިނާކުރުމަށް އެންމެ ބޮޑަށް މަސައްކަތް ކުރަނީ އަދާލަތުން ކަމަށާއި، އެގޮތުން އިސްލާމިކް ބޭންކެއް ގެނައުމަށް އަދާލަތުން ވަރަށް ބުރަކޮށް މަސައްކަތް ކޮށްފައިވާ ކަމަށެވެ. އަދި ހުސްވި އަހަރަކީ އެންމެ ބޮޑު ފައިދާއެއް އިސްލާމިކް މިނިސްޓްރީ އަށް ލިބުނު އަހަރު ކަމަށާއި، މިގޮތުން 138 މިލިޔަން ރުފިޔާ އެ މިނިސްޓްރީއަށް ބޭރުގެ އެހީގެ ގޮތުގައި ލިބިފައިވާކަން ފާހަގަ ކުރެއްވި އެވެ.

ރޭގެ ޖަލްސާގައި އެޕާޓީގެ ރައީސް ޝެއިޚް އިމްރާން އަބްދުﷲ ވިދާޅުވީ ކުޅުދުއްފުށީގައި ހިއްކާފައިވާ ބިމަކީ ރައްޔިތުންނަށް ލާބައާއި މަންފާ ކުރާނެ ގޮތަށް ހިއްކާފައިއޮތް ތަނެއް ނޫން ކަމަށާއި، އެއީ ކުރީގެ ރައީސް ނަޝީދުގެ ވެރިކަމުގައި އިންދެވި އޮށެއް ކަމަށެވެ. އަދި އެތަނުގައި އެޅުމަށް ހަމަޖެހިފައިވާ ސިޓީ ހޮޓާގެ ޑިޒައިން ކޮށްފައިވަނީ އަންހެނާ އާއި ފިރިހެނާގެ ލަދުވެތި ގުނަވަން ފާޅުވާ ގޮތަށް ކަމަށާއި، އެއްޖިންސުން ގުޅުން ހިންގުމަށް ފުރުސަތު ބޮޑުވާ ގޮތަށް ކަމަށް ވިދާޅުވެ ވަރަށް ބޮޑަށް ފާޑުވިދާޅުވި އެވެ.

ޕާޓީގެ މަޝްވަރާ މަޖިލީހުގެ ރައީސް ޝެއިޚް މުހައްމަދު ދީދީ ރޭ ދެއްކެވި ވާހަކައިގާ އަދާލަތު ޕާޓީއަކީ ކޮރަޕްޝަނަށް ޖާގަ ދޭނެ ޕާޓީ އެއް ނޫން ކަމަށާއި އިދިކޮޅު ފަރާތް ތަކުން ތަފާތު އެކި ނަންނަމުން މުޚާތަބު ކުރާއިރު ވެސް ކޮރަޕްޝަނޭ ކިޔައިގެން ވާހަކަ ނުދެއްކުމަކީ މިކަމުގެ ހެއްކެއް ކަމަށެވެ.

ޑިފެންސް މިނިސްޓްރީގެ ސްޓޭޓް މިނިސްޓަރ މުހައްމަދު އަހުމަދާއި ހައުސިން މިނސްޓަރ ޑރ މުހައްމަދު މުއިއްޒުވެސް ބައިވެރިވެލެއްވި މިބައްދަލުވުމުގައި ވާހަކަ ދެއްކެވި ގިނަ ފަރާތްތަކުން އިސްލާމްދީނާއި ދިވެހި ޤައުމަށްޓަކައި އަދާލަތަށް ވަނުމަކީ އެންމެ ފައިދާ ހުރި ގޮތް ކަން ފާހަގަކުރެއްވި އެވެ.

ރޭ ނިޔަލަށް އަފީފުއްދީން ސްކޫލު ހޯލުގައި އޮތް މިބައްދަލުވުމުގައި ބައިވެރިވެފައިވަނީ ގާތްގަނޑަކަށް 100 މީހުންނެވެ. މި ބައްދަލުވުން ނިންމާލާފައިވަނީ ޝެއިޚް އިލްޔާސް ގެ ދަރުސަކުންނެވެ.