އަންހެނުންނަށް ކުރާ އަނިޔާއާ ދެކޮޅަށް ކުރިއަށްގެންދާ “ވަން ބިލިއަން ރައިސިންގ” ކެމްޕޭން މާދަމާ ކުޅުދުއްފުށީގައިވެސް ކުރިއަށްދާނެ

އަންހެނުންނަށް ކުރާ އަނިޔާއާ ދެކޮޅަށް ކުރިއަށް ގެންދާ އެއް ބިލިއަން މީހުން އަޑުއުފުލުމުގެ ކެމްޕޭން، މާދަމާ ކުޅުދުއްފުށީގައިވެސް އޮންނާނެ ކަމަށް އެކަން އިންތިޒާމުކުރާ ފަރާތުން ބުނެފި އެވެ.

“ހުއްޓުވޭނެ ހުއްޓުވާނަން” މި ނަމުގައި އަންހެނުންނަށް ކުރާ އަނިޔާއާއި ދެކޮޅަށް ދުނިޔޭގައި މާދަމާ ކުރިއަށްގެންދާ މި ކެމްޕޭން ކުޅުދުއްފުށީގައި ކުރިއަށް ގެންދަނީ ކުޅުދުއްފުށީގައި ހުންނަ ހދ. ފެމިލީ އެންޑް ޗިލްޑްރެންސް ސާރވިސް ސެންޓަރާއި ރަށުގެ މުއައްސަސާތަކާއި ޖަމްއިއްޔާތަކާއި ގުޅިގެންނެވެ.

މިނޫހަށް މައުލޫމާތު ދެއްވަމުން ފެމިލީ އެންޑް ޗިލްޑްރަންސް ސާރވިސް ސެންޓަރުގެ ސޯޝަލް ސާރވިސް އޮފިސަރ އާސިމާ އަހުމަދު ވިދާޅުވި ގޮތުގައި މާދަމާ ކުޅުދުއްފުށީ ކައުންސިލް އިދާރާގެ ކުރިމަތީގައި އޮންނަ މި އަޑު އުފުލުމުގައި އަތްތިލައިގެ ތައްގަނޑު ޖެހުމާއި ދުވަހާ ގުޅޭ ގޮތުން ޝުއޫރު ފާޅުކުރުން ކުރިއަށްދާނެ އެވެ.

އަންހެނުންނަށް ކުރާ އަނިޔާތައް އާއްމުވެފައިވާ މިންވަރު މީހުންގެ ސަމާލުކަމަށް ގެނައުމަށްޓަކައި އަންހެނުންގެ ހައްގުތަކަށް މަސައްކަތް ކުރާ ޖަމާއަތްތަކުން ރާއްޖޭގެ އެކިކަންކޮޅުތަކުގައި މިހަރަކާތް މާދަމާ ހަވީރު 4 ޖަހާއިރު ކުރިއަށް ގެންދާނެ އެވެ.

އެއް ގަޑިއިރަށް ކުރިއަށް ގެންދާ މިހަރަކާތުގައި ވީހާވެސް ގިނަ ފަރާތްތަކުން ބައިވެރިވުމަށް އެކަން އިންތިޒާމުކުރާ ފަރާތްތަކުން އެދިލައްވައެވެ.