މަސްތުވާތަކެތީގެ މައްސަލައެއްގައި ކުޅުދުއްފުށިން މީހަކު ހައްޔަރުކޮށްފި

މަސްތުވާތަކެތި ކަމަށް ޝައްކުކުރެވޭ އެއްޗެއްހުރި ރަބަރު ޕެކެޓަކާއެކު ކުޅުދުއްފުށިން މީހަކު ހައްޔަރުކޮށްފި އެވެ.

ފުލުހުން މައުލޫމާތުދޭގޮތުގައި މި މީހާ ހައްޔަރުކޮށްފައިވަނީ، ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން ކުޅުދުއްފުށީ ޕޮލިސް ސްޓޭޝަނުން ހިންގި އޮޕަރޭޝަނެއްގައި އެވެ.

ފުލުހުން ބުނިގޮތުގައި އުމުރުން 25 އަހަރުގެ އެ ފިރިހެން މީހާ ހައްޔަރުކޮށްފައިވަނީ މިދިޔަ ހޯމަ ދުވަހު، ހދ. ނޮޅިވަރަންފަރުން ކުޅުދުއްފުއްޓަށް އައި ދޯންޏެއްގައި އައިސް ކުޅުދުއްފުށީގެ ބަނދަރުމަތީ ހުއްޓައެވެ.

އެ މީހާ ހައްޔަރުކުރުމަށްފަހު އެ މީހާގެ ކުޑަކަމުދާ ތަކެތި ޓެސްޓުކުރިއިރު މަސްތުވާތަކެތީގެ ބާވަތެއްކަމުގައިވާ ޓީ.އެޗް.ސީ އަށާއި ބެންޒޯއަށް ވަނީ ޕޮޒިޓިވް ވެފައި އެވެ. އަދި އޭނާގެ ހަށިގަނޑު ބަލާފާސްކުރިއިރު މަސްތުވާތަކެތިކަމަށް ޝައްކުކުރެވޭ އެއްޗެއް ހުރި ރަބަރު ޕެކެޓެއް ފެނިފައިވާ ކަމަށް ފުލުހުންގެ މީޑިޔާއިން މައުލޫމާތު ދެއެވެ.

މަސްތުވާތަކެތީގެ މި މައްސަލަ ކުޅުދުއްފުށީ ޕޮލިސް ސްޓޭޝަނުން މިހާރު އަންނަނީ ތަހުގީގު ކުރަމުންނެވެ. މިމައްސަލައިގައި ހައްޔަރުކުރި މީހާގެ އިތުރު ތަފްސީލެއް އަދި މިހާތަނަށް ފުލުހުން ހާމަކޮށްފައެއް ނުވެއެވެ.