ކަނޑަށް ވެއްޓި ގެއްލިގެން ހޯދަމުންދިޔަ ދާއޫދު މުޙައްމަދު މަރުވެފައި އޮއްވާ ފެނިއްޖެ

މާލެ އަތޮޅު ރީތިރަށް ރިސޯޓް ކައިރިން މާލެ ދަތުރުކުރި ލޯންޗަކާއި ތެޔޮބާޖެއް ޖެހި ހިނގި އެކްސިޑެންޓްގައި މޫދަށް ވެއްޓި ގެއްލިގެން ހޯދަމުން ދިޔަ ކުޅުދުއްފުށީ ޒޭވަރު، ދާއޫދު މުޙައްމަދު މަރުވެފައި އޮއްވާ ފެނިއްޖެ އެވެ.

ފުލުހުންގެ މީޑިއާ އޮފިޝަލް މިނޫހަށް މަޢުލޫމާތު ދެއްވަމުން ވިދާޅުވީ، އޭނާ ގެއްލުނު ކަމުގެ ރިޕޯޓް ލިބުމާ ހިސާބުން ކޯސްގާޑުން އޭނާ ފެނޭތޯ މަސައްކަތް ކުރަމުން ދިޔަ ކަމަށާއި، އޭނާގެ ހަށިގަނޑު ފެނުނީ މިއަދު ހަވީރު 6 ޖެހިއިރު އެވެ. ހަށިގަނޑު ފެނުނު އިރު އޭނާގެ ފުރާނަ ނެތްކަމަށް ފުލުހުން މަޢުލޫމާތު ދިނެވެ.

އޭނާ ފެނިފައި ވަނީ އެކްސިޑެންޓް ހިނގި ކ. އާރަށާ ދިމާލު ކަނޑުގެ އަޑިންނެވެ. އޭނާ ހޯދުމަށް ރީތިރަށް ރިސޯޓްގެ ޑައިވިންގ ޓީމުންވެސް ދިޔައީ މަސައްކަތް ކުރަމުންނެވެ.

މުޙައްމަދު ދާއޫދަކީ ރީތިރަށް ރިސޯޓުގެ އިންޖީނުގޭގައި މަސައްކަތްކުރާ މުވައްޒަފެކެވެ.

މިހާދިސާގައި އެ ލޯންޗުން ދަތުރުކުރި 9 މީހުންގެ ތެރެއިން 8 މީހަކަށް އެކިވަރުގެ އަނިޔާތައް ވެގެން އައި.ޖީ.އެމް ހޮސްޕިޓަލުންނާއި އޭ.ޑީ.ކޭ ހޮސްޕިޓަލުން ދަނީ ފަރުވާ ދެމުންނެވެ.

މިހާދިސާގައި ދަތުރު ކުރި ރީތިރަށުގެ މުވައްޒަފުން ގޮވައިގެން ދަތުރުކުރި ސިރިއަސްގެ ލޯންޗު ވަނީ ވަރަށް ބޮޑަށް ހަލާކުވެފައެވެ. އަދި ތެޔޮ ބާޖަށްވެސް އެކިވަރުގެ ގެއްލުންވެފައިވެއެވެ.