އެމްޑީޕީގެ ކެމްޕެއިން ޓީމެއް ކުޅުދުއްފުއްޓަށް އަތުވެއްޖެ

ރާއްޖޭގެ އެކިސަރަހައްދުތަކުގައި މިހާރު ކުރިއަށްދާ އެމްޑީޕީގެ ކެމްޕޭން ދަތުރުތަކުގެ ތެރެއިން، އެޕާޓީގެ އިސް މެމްބަރުންތަކެއް ހިމެނޭ ކެމްޕޭން ޓީމެއް ކުޅުދުއްފުއްޓަށް އަތުވެއްޖެ އެވެ.

އިއްޔެ މި ޓީމު ކުޅުދުއްފުއްޓަށް އައުމުން، މަރުހަބާ ދެންނެވީ އެމްޑީޕީގެ ކުޅުދުއްފުށީ ދެކުނު ދާއިރާގެ ނައިބު ރައީސް އަލީ މުހައްމަދާއި އެމްޑީޕީގެ ސަޕޯޓަރުންނެވެ.

މި ދަތުރުގައި ބައިވެރިވެލައްވަނީ ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ މެމްބަރު އަބްދުލް ޣަފޫރު މޫސާ އާއި، ތޮއްޑޫ ދާއިރާގެ މެމްބަރު އަލީ ވަހީދުގެ އިތުރުން ރައީސް ނަޝީދު ސަރުކާރުގެ ޑިފެންސް އެޑްވައިޒަރ އަމީން ފައިސަލާއި އޭރުގެ އެޑިއުކޭޝަން މިނިސްޓަރ ޝިފާ މުހައްމަދެވެ.

އެމްޑީޕީ ކުޅުދުއްފުށީ ގޮފިން މައުލޫމާތު ދޭ ގޮތުގައި މި ދަތުރުގައި ރައްޔިތުންނާއި ބައްދަލުކޮށް މައުލޫމާތާއި ޚިޔާލު ބަދަލުކުރުމަށް ވަނީ ހަމަޖެހިފައެވެ. މިގޮތުން އިއްޔެ ރޭ އެޕާޓީގެ ބައެއް ފަރާތްތަކާއި ބައްދަލުކޮށްފައި ވެއެވެ.

މެމްބަރު އަލީ ވަހީދަކީ ކުޅުދުއްފުއްޓަށް ނިސްބަތްވާ މެމްބަރެއް ނަމަވެސް މިއީ ސިޔާސީ ހަރަކާތަކަށް އަލީ ވަހީދު މިރަށަށް ޒިޔާރަތް ކުރާ ފުރަތަމަ ފަހަރެވެ.