ފެރީ ނިޒާމުގެ ބައެއް ފެރީތަކުގެ ފަޅުވެރިންނަށް މުސާރަ ނުދޭތާ 3 މަސް ވެފައިވާކަމަށް ފަޅުވެރިން ބުނެފި

އުތުރުގެ ތިން އަތޮޅުގައި ފެރީގެ ޚިދުމަތްދޭ ޓްރައިނަސް ހޯލްޑިންގ ފަރާތުން ދުއްވާ ” މިލޭނިއަމް” ފެރީ ގެ ފަޅުވެރިންނަށް މުސާރަ ނުދޭތާ 3 މަސް ވެފައިވާ ކަމަށް ފަޅުވެރިން ބުނެފި އެވެ.

މިލޭނިއަމް ފެރީގެ ފަޅުވެރިޔަކު މިނޫހަށް މައުލޫމާތު ދެމުން ބުނީ މުސާރަ ނުލިބޭތާ 3 މަސްދުވަސް ވެފައިވާ ކަމަށާއި، އެގޮތުން މިހާރު 14250 ރުފިޔާ ނުލިބިވާ ކަމަށެވެ. ފެރީގެ އިސް ފަރާތްތަކާ މިކަމާގުޅޭ ގޮތުން ސުވާލުކުރުމުން ފައިސާ ނެތް ކަމަށް ބުނެފައިވާ ކަމަށްވެސް ފަޅުވެރިން ބުންޏެވެ. އަދި މިހާރު ފެރީ އަށް  ތެޔޮ އަޅާނެ ފައިސާ ނެތިގެން ފެރީ ދުއްވުން ހުއްޓިފައިވާ ކަމަށްވެސް އޭނާ ބުންޏެވެ.

މިކަމާގުޅިގެން ޓްރައިނަސްގެ އިސްވެރިންނަށް ގުޅާލުމަށް ކުރި މަސައްކަތް ވަނީ ކާމިޔާބު ވާގޮތް ނުވެފައެވެ.

މިލޭނިއަމް ފެރީއަކީ ނޮޅިވަރަމާއި ނޮޅިވަރަންފަރާއި، ހަނިމާދޫ، ނެއްލަައިދޫ އަދި ހިރިމަރަދޫ ގެ އިތުރުން ކުރިނބީ އަށްވެސް ދަތުރުކުރާ ފެރީއެކެވެ. މި ފެރީ އަކީ 80 މީހުންގެ ޖާގައިގެ ފެރީ އެކެވެ.

ޓްރައިނަސް ސީއޭއީ ހޯލްޑިންގ ގެ ކުޅުދުއްފުށީގައި ހުންނަ އޮފީސް ބަންދުކޮށްފައި ހުންނަތާ މިހާރު  2 މަހަށް ވުރެ ގިނަ ދުވަސް ވަނީ ވެފަ އެވެ.