ކުޅުދުއްފުށީ އަމީނީމަގުގައި އަތުރަން ގެނެސްފައި ހުރި ގައުތައް އަނބުރާ ގެންދަނީ

ކުޅުދުއްފުށީ އަމީނީމަގުގައި އެތުރުމަށް މޯލްޑިވްސް ރޯޑް ޑެވެލޮޕްމަންޓް ކޯޕަރޭޝަން (އެމްއާރުޑީސީ) އިން ގެނެސްފައިވާ ގައުތަކުގެ ތެރެއިން ބައެއް އަނބުރާ ފޮނުވާލުމުގެ މަސައްކަތް އެކުންފުނިން ފަށައިފި އެވެ.

ރައީސުލްޖުމްހޫރިއްޔާ ޑރ. މުޙައްމަދު ވަހީދު ހަސަން ދާދިފަހުން ކުޅުދުއްފުއްޓަށް ވަޑައިގެން ފަށްޓަވައި ދެއްވި ގާއެތުރުމުގެ މަސައްކަތަށް ގެނެވުނު ގަލުގެ ތެރެއިން އަނބުރާ ފޮނުވާލަނީ ފެންވަރު ދަށްވުމުން ރިޖެކްޓްކުރެވޭ ގައުތައް ކަމަށް އެމްއާރުޑީސީ އިން ބުނެއެވެ.

މިނޫހަށް މައުލޫމާތު ދެއްވަމުން އެމްއާރުޑީސީގެ މެނޭޖިންގ ޑިރެކްޓަރ އިބްރާހިމް ނަޒީމް ވިދާޅުވީ އެބޭފުޅުން އެގްރީމެންޓް ހެދީ ވަކި ސްޓޭންޑާޑަކަށް ފެތޭ ގޮތަށް ގައު ގެނައުމަށް ކަމަށާއި ޤަބޫލު ނުކުރެވޭ ފެންވަރުގެ ގައު މާލެ ގެންދަނީ ބަދަލު ދޭނެ ކަމަށް ކޮންޓްރެކްޓަރުން ބުނެފައި ވާތީ ކަމަށެވެ.

“އަޅުގަނޑުމެން ކޮންޓްރެކްޓް ހެދީ ވަކި ސްޓޭންޑާޑް އަކަށް ފެތޭ، ވަކި ޓެކްސްޗަރ އެއްގެ ގައު ސަޕްލައި ކުރަން. އަޅުގަނޑުމެން ބެލިބެލުމުން މި އެނގުނީ ސްޓޭންޑާޑަށް ނުފެތޭކަން. ފެންވަރުދަށް ވީމަ މާލެ ގެންދަނީ ބަދަލު ހޯދަން.ރިޕްލޭސް ކޮށްދޭނެ ކަމަށް އަންގާފަ އޮތީ.” ނަޒީމް ވިދާޅުވި އެވެ.

އެމްއާރްޑީސީއަށް ގައު ސަޕްލައި ކުރާ ފަރާތައް ގަލުގެ ފެންވަރުދަށް ވުމުގެ ސަބަބުން ޝަކުވާ ހުށައަޅުއްވާފައިވާނެ ކަމަށާއި މިގޮތުން ކުޅުދުއްފުއްޓަށް ގެނެސްފައިވާ 270000 ގަލުގެ ތެރެއިން 50000 ގައު ފެންވަރު ދަށް ވުމުގެ ސަބަބުން މާލެ ގެންދިޔުމުގެ މަސައްކަތް ކުރިއަށްދާ ކަަމަށްވެސް ނަޒީމް ވިދާޅުވި އެވެ.

އަމީނީމަގުގައި އަތުރަން ކުޅުދުއްފުއްޓަށް ގެނެސްފައި ހުރި ގައުތައް ގެންދާތީ ރައްޔިތުންގެ ތެރެއިން ބަޔަކު ވަނީ ބަނދަރު ސަރަހައްދުގައި ހިތްހަމަނުޖެހުން ވެސް ފާޅުކޮށްފައެވެ.

އިތުބާރުހުރި ފަރާތަކުން މިނޫހަށް މައުލޫމާތު ހިއްސާ ކުރަމުން ބުނީ ދެން މިރަށުގެ މަގުތަކުގައި އެމްއާރްޑީސީ އިން ގައު ނާތުރާނެ ކަމަށާއި، މި މަޝްރޫއު ހަވާލުކޮށްފައިވަނީ ލަންކާގެ ކުންފުންޏަކާ ކަމަށެވެ. އެހެން ކަމަށްވުމުން އެމްއާރްޑީސީގެ ތަކެތި މަޑުމަޑުން ރަށުން ބާލަނީ ކަމަށްވެސް އޭނާ ބުންޏެވެ. އިތުރަށް އޭނާ ބުނީ ވަރަށް އަވަހަށް ލަންކާގެ މި ކުންފުނިން ގައު އެތުރުމާއި ހަވާލުވާނެ ކަމަށާއި، އެމްއާރްޑިސީ އަށް ޖެހޭނީ ހަމައެކަނި ކޮންސަލްޓަންޓެއްގެ ރޯލު އަދާކުރުމަށް ކަމަށެވެ.

މިކަމާގުޅިގެން ކުޅުުދުއްފުށީ ކައުންސިލްގެ ރައީސް ވިދާޅުވީ ކައުންސިލުން އެންމެ ކަންބޮޑުވާކަމަކީ މަގު ހަދަން ނުފެށި ގެނެސްފައިވާ ގައު ތައް ގެންދާތީ ކަމަށެވެ. އަދި އެމްއާރްޑީސީގެ ވެހިކަލްތަކުގައި މިގައު ތައް ގެންދިޔުމަކީ ސަރުކާރުގެ ބަޖެޓް އިތުރަށް ބޮޑުވެގެންދާނެ ކަމެއް ކަމަށާއި މި ގައު ގެންދަން ޖެހޭނީ ސަޕްލައި ކުރި ފަރާތްތަކުން ކަމަށެވެ.

މިއަދު ގާތްގަނޑަކަށް 11 ޖަހާއިރުން ފެށިގެން ގައުތައް  އެމްއާރްޑީސީގެ ވެހިކަލްތަކުގައި ސަރަހައްދީ ބަނދަރަށް ދަނީ ގެންދަމުންނެވެ.