މިފެށޭ ހަފްތާގެ ތެރޭގައި ހިރިމަރަދޫގެ މައްސަލަ ވަރަށް ހޫނުކޮށް ގެންގޮސްދޭނަން: މެންބަރު ގަފޫރު

ހިރިމަރަދުއިން އަޙްމަދު މުޙައްމަދު

މިދުވަސްކޮޅު ސިޔާސީ ޕާޓީތަކުގެ ބިލާހުރެ މަޖިލީހުގެ މަސައްކަތް ކޮންމެވެސް ވަރަކަށް މަޑުޖެހިފައިވާ ކަމަށާއި އެހެން ނަމަވެސް މި ފެށޭ ހަފުތާގައި ހދ. ހިރިމަރަދޫ ބަނދަރުގެ މައްސަލަ މަޖިލިސް ތެރޭގައި ވަރަށް ހޫނުކޮށް ގެންގޮސް ދޭނަންކަމުގައި ސަރުކާރުގެ މަސްޢޫލިއްޔަތު އަދާކުރާ މިންވަރުބަލާ ކޮމެޓީގެ މެންބަރެއް ކަމުގައިވާ ކުޅުދުއްފުށީ އުތުރު ދާއިރާގެ މެންބަރު އަބުދުލްޤަފޫރު މޫސާ ވިދާޅުވެއްޖެއެވެ.

ގަފޫރު މިހެން ވިދާޅުވީ ރޭ 9:00 ގައި މުޒާހަރާގެ ބައިވެރިންނާ ފޯނު މެދުވެރިކޮށް ވާހަކަފުޅު ދައްކަވަމުންނެވެ. މުޒާހަރާގެ ބައިވެރިންނާ މުހާތަބުކޮށް ގަފޫރު ވިދާޅުވީ ބަނދަރު ނުހެދި އޮތުމުން ވާނެ ދަތި އިޙްސާސްކުރެއްވޭ ކަމަށާއި ބަނދަރު ހެދުމަށްޓަކައި ކުރަންޖެހޭ އެންމެހާ ކަންތައްތައް ރައްޔިތުންގެ މަޖިލީހުގެ ސަރުކާރު މަސްޢޫލިއްޔަތު އަދާކުރާ މިންވަރުބަލާ ކޮމެޓީގެ ފަރާތުން ކޮށްދޭނެ ކަމުގެ ޔަޤީންކަން ދެއްވާ ކަމަށެވެ.

“އަޅުގަނޑުމެންނަށް އެނގޭ ބަނދަރު ނުހެދި އޮތުމުން ވާނެ ދައްޗާއި ކަންތައްތައް. އެހެންވީމާ ހަމަ އިރާދަކުރެއްވިއްޔާ އަޅުގަނޑުމެން ތިކަމުގައި ހަމަ ކުރެވެންހުރި ހުރިހާ މަސައްކަތެއް ސަރުކާރު ޒިންމާދާރު ކުރުވާ ކޮމެޓީގެ ފަރާތުން ކުރަމުން ގެންދާނަން.” ގަފޫރު ވިދާޅުވި އެވެ.

ގަފޫރު ވިދާޅުވީ އެބޭފުޅާއަކީ ތިލަދުންމައްޗަށް އުފަން ދަރިއެއްކަމަށާއި ހިރިމަރަދުއަށް ދިމާވެފައިވާ މައްސަލަތައް ޙައްލުކުރުމުގައި އެމަނިކުފާނަށް ކުރެވެން ހުރި މަސައްކަތްތައް ކޮށްދެއްވާނެ ކަމަށެވެ.

ހިރިމަރަދޫ ބަނދަރު ހެދުމުގެ މައްސަލައިގައި އެރަށު ރައްޔިތުން ފެށި މުޒާހަރާ މިހާރު ވަނީ ސިލްސިލާ މުޒާހަރާ އަކަށް ބަދަލުވެފައި އެވެ. ހިރިމަރަދޫ ކައުންސިލް އިދާރާ ހިޞޯރުކޮށްގެން ރައްޔިތުން މުޒާހަރާކުރާތާ 5 ދުވަސް ވެފައިވާއިރުވެސް ސަރުކާރުގެ އެއްވެސް އިދާރާއަކުން އެދެވޭ އިޖާބައެއް ދެއްވާފައި ނުވާކަން މުޒާހަރާގެ ބައިވެރިން ފާހަގަކުރެއެވެ. އަދި ސަރުކާރުން ރައްޔިތުންގެ އަޑު އަހަންދެން މުޒާހަރާ ކުރިއަށް ގެންދާނެ ކަމުގައި ބުނެއެވެ.