ކުޅުދުއްފުށީގެ ސްކޫލުތަކާއި އެމްއެންޑީއެފް ގުޅިގެން، ކުރިއަށް ގެންދިޔަ ފަތަން ދަސްކޮށްދިނުމުގެ ޕްރޮގްރާމް ނިމިއްޖެ

ކުޅުދުއްފުށީގެ ސްކޫލުތަކާއި އެމްއެންޑީއެފް ގުޅިގެން، ކުރިއަށް ގެންދިޔަ ފަތަން ދަސްކޮށްދިނުމުގެ ޕްރޮގްރާމް ނިމިއްޖެ އެވެ.

“ކޮންމެ ދަރިވަރަކީ ފަތަން ދަސްވެފައިވާ ދަރިވަރެއް” މި ޝިއާރުގެ ދަށުން ހިންގި ފަތަން ދަސްކޮށްދިނުމުގެ ޕުރޮގްރާމާބެހޭ ގޮތުން އެމްއެންޑީއެފްގެ ކޯޕްރަލް އަދުނާން އަހުމަދު ވިދާޅުވީ މި ޕްރޮގްރާމަކީ ކޮންމެ ދަރިވަރަކީ ވެސް ފަތަން ދަސްވެފައިވާ ކުއްޖަކަށް ހެދުމުގެ ގޮތުން ގެންދެވުނު ޕްރޮގްރާމެއް ކަމަށެވެ. މި ޕްރޮގްރާމް ނިންމުމުގެ ގޮތުން ދެވުނު ފައިނަލް ޓެސްޓުގައި 25 މީޓަރު ފްރީ ސްޓައިލް ނިންމިފައިވާ ދަރިވަރުން އެއީ ފާސްވެފައިވެފައިވާ ކުދިންގެ ގޮތުގައި ނިންމާފައިވާ ކަމަށް އަދުނާނު ވިދާޅުވިއެވެ.

މި ޕްރޮގްރާމްގައި ކުޅުދުއްފުށީ އަފީފުއްދީން ސްކޫލުގެ ގްރޭޑް 4 އަދި 5 އިން ބައިވެރިވި 69 ދަރިވަރުންގެ ތެރެއިން 67 ދަރިވަރުން ހާސިލްވާންޖެހޭ މިންގަނޑުން ފާސްވެފައިވާ ކަމަށް އަދުނާން ވިދާޅުވި އެވެ. އަދި ހދ އަތޮޅު ތައުލީމީ މަރުކަޒުގެ 105 ލިޓިލްމެއިޑުންގެ  ތެރެއިން 96 ދަރިވަރުން ފާސްވެފައިވެއެވެ.

ހދ އަތޮޅު ތައުލީމީ މަރުކަޒުގެ ޕްރިންސިޕަލް ޒިޔާދު ރަޝާދު ވިދާޅުވީ، އެމްއެންޑީއެފް އިން ކަނޑައަޅާފައިވާ މިންގަނޑު ހުރިހާ ދަރިވަރުންނަށް ހާސިލް ކުރެވިފައި ނުވިނަމަވެސް ބައެއް ދަރިވަރުން 1000 މީޓަރަށްވެސް ފަތާފައިވާ ކަމަށެވެ. އަދި އެކުދިންގެ އުމުރާއި އަޅާބަލާއިރު މިއީ ވަރަށް ބޮޑު ކުރިއެރުމެއް ކަންވެސް ފާހަގަ ކުރެއްވިއެވެ. ޒިޔާދު އިތުރަށް ވިދާޅުވީ އެމްއެންޑީއެފްގެ ބޭފުޅުން މި ޕްރޮގްރާމް ކުރިއަށް ގެންދެވީ ވަރަށް ބޮޑު އަހައްމިއްޔަތު ކަމެއް ދީގެން ވަރަށް ފަރުވާތެރި ކަމާއިއެކު ކަމަަށާއި ބެލެނިވެރިންގެ ފަރާތުން ލިބިލައްވާފައިވާ އެއްބާރުލުންވެސް ފާހަގަކުރައްވާ ކަމަށެވެ.

މި ޕްރޮގްރާމާއި ބެހޭގޮތުން އަފީފުއްދީން ސްކޫލުގެ ޕްރިންސިޕަލް އާދަމް މޫސާ ވިދާޅުވީ މިއީ ވަރަށް ކާމިޔާބު އަދި ބޭނުންތެރި ޕްރޮގްރާމެއް ކަމަށެވެ. އަދި މި ޕްރޮގްރާމް ކުރިއަށްގެންދިޔުމުގައި އެމްއެންޑީއެފްއާއި ބެލެނިވެރިންގެ ފަރާތުން ލިބުނު އެއްބާރުލުންވެސް އާދަމް މޫސާ ފާހަގަ ކުރެއްވިއެވެ.

މި ޕްރޮގްރާމުގައި ދަރިވަރުންގެ ސަލާމަތާއި ބެހޭކަންކަން ބަލަހައްޓާފައިވަނީ އެމްއެންޑީއެފްގެ ފަރާތުންނެވެ. މި ޕްރޮގްރާމް ކުރިއަށް ގެންގޮސްފައިވަނީ ހުސްވި ފެބްރުއަރީ މަހުގެ 23 އިން މި މަހުގެ 11 ގެ ނިޔަލަށެވެ