ބަޖެޓު ނެތުމުގެ ސަބަބުން ކުޅުދުއްފުށީގައި ހުންނަ ބިޒްނަސް ޑިވެލޮޕްމެންޓް ސާރވިސް ސެންޓަރުން ހިދުމަތްދިނުން ހުއްޓާލާފައި

ކުޅުދުއްފުށީގައި ހުންނަ ބިޒްނަސް ޑިވެލޮޕްމެންޓް ސާރވިސް ސެންޓަރު (ބީޑީއެސްސީ) ހިންގުން ބަޖެޓުގެ ތާށިކަމާހުރެ ހުއްޓާލައިފި އެވެ.

މިނޫހަށް މައުލޫމާތު ހިއްސާކުރި ފަރާތަކުން ނަން ހާމަނުކުރުމަށް ޝަރުތުކޮށް ވިދާޅުވީ، މިމަހުގެ 7 ވަނަ ދުވަހު އެ ސެންޓަރު ހިންގުން ހުއްޓާލުމަށް އެންގުމާއި ގުޅިގެން އެތަނުން ޚިދުމަތް ދިނުން މިހާރު ހުއްޓާލާފައިވާ ކަމަށެވެ. އެތަން ބަންދުކޮށްފައިވަނީ ބަޖެޓުގެ ތާށިކަން ދިމާވުމުން ކަމަށާއި އަދި އެ ސެންޓަރުން ކުރަމުންއައި ތަކެތި ބަންދުކޮށް ލޭބަލް ކުރާނެ ފެސިލިޓީއެއް ޤާއިމު ކުރުމަށް ކުރި މަސައްކަތްވެސް ބަޖެޓް ނެތުމުގެ ސަބަބުން ހުއްޓިފައިވާ ކަން އެބޭފުޅާ ފާހަގަކުރެއްވިއެވެ.

ރައީސް ނަޝީދުގެ ވެރިކަމުގައި 2010 ވަނަ އަހަރު ޚިދުމަތް ދޭންފެށި މި ސެންޓަރުން ވިޔަފާރީގައި އަމިއްލަ ފަރުދުންގެ ބައިވެރިވުން އިތުރު ކުރުމާއި ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް މަސައްކަތްކުރުން ފަދަ ޚިދުމަތްތައް ދެމުން ގެންދިޔައެވެ. މިގޮތުން އަމިއްލަ ވިޔަފާރިތައް ކުރިއެރުވުމަށާއި ވިޔަފާރިއާ ގުޅޭ ގޮތުން އާންމުންނަށް ކޮންސަލްޓެންސީ ވެސް މި ސެންޓަރުން ދެމުން ގެންދެއެވެ. މީގެ އިތުރުން މި ސެންޓަރުން އާއްމު ކުދި ވިޔަފާރި ކުރާ ފަރާތްތައް ރާއްޖެއިން ބޭރަށް ފޮނުވާ ތަފާތު ޕްރޮގްރާމު ތަކުގައި ބައިވެރިކޮށްފައިވެސް ވެއެވެ.

ކުޅުދުއްފުށި އޮންލައިނަށް އެނގިފައިވާ ގޮތުގައި، ރާއްޖޭގެ އެހެން ސަރަހައްދުތަކުގައިހުރި ބީޑީއެސްސީތަކުން ވެސް މިހާރުވަނީ ހިދުމަތްދިނުން މެދުކެނޑިފައި އެވެ.

މިކަމާގުޅޭގޮތުން ޓްރޭޑް މިނިސްޓްރީގެ ރަސްމީ ބަހެއް މިއަދު ވަނީ ލިބޭގޮތްނުވެފައި އެވެ.