އެމްއެންޑީއެފާއި ސްކޫލުތައް ގުޅިގެން ކުރިއަށްގެންދިޔަ ފެތުމުގެ ޕްރޮގްރާމް ނިންމި ދަރިވަރުންނަށް ސެޓްފިކެޓް ހަވާލުކޮށްފި

މި ޕްރޮގްރާމުގައި 1000 މީޓަރަށް 19 ކުއްޖަކު ފަތާފައިވޭ

އެމްއެންޑީއެފާއި ސްކޫލުތައް ގުޅިގެން ކުރިއަށްގެންދިޔަ ފެތުމުގެ ޕްރޮގްރާމް ނިންމާ ފަތަން ދަސްވި ދަރިވަރުންނަށް ސެޓްފިކެޓް ހަވާލުކޮށްފި އެވެ.

އިއްޔެ މެންދުރު އަފީފުއްދީން ސްކޫލު ހޯލުގައި މިކަމަށްޓަކައި ބޭއްވި ރަސްމިއްޔާތު ޝަރަފްވެރިކޮށްދެއްވާ ދަރިވަރުންނަށް ސެޓްފިކެޓް ހަވާލުކޮށްދެއްވީ އެމްއެންޑީއެފް ގްލޯބަލް އޭރިޔާގެ ޑެޕިއުޓީ ކޮމާންޑަރ ކެޕްޓަން އަހުމަދު ރަމީޒެވެ.

މިރަސްމިއްޔާތުގައި ހދ. އަތޮޅު ތަޢުލީމީ މަރުކަޒާއި އަފީފުއްދީން ސްކޫލުން 153 ދަރިވަރަކު ވަނީ ސެޓްފިކެޓް ހާސިލްކޮށްފައެވެ. މިރަސްމިއްޔާތުގައި ޝަރަފްވެރި މެހެމާނު ދެއްކެވި ވާހަކައިގައި މޫދުގެ ޕްރޮގްރާމުތަކުގައި ބައިވެރިވެ ފަތަން ދަސްވެފައިވާ ދަރިވަރުން، ފަތަން ނޭނގޭ ކުދިންނަށް އެހީތެރިވުމަށް އެދިލެއްވިއެވެ. އަދި ފަތަން އެނގުނު ކަމުގައި ވިޔަސް ބޮޑުމީހެއްގެ އެހީތެރިކަން ހޯދުމަށް ނަސޭހަތްތެރި ވެލެއްވި އެވެ.

މިރަސްމިއްޔާތުގައި އަފީފުއްދީން ސްކޫލުގެ ޕްރިންސިޕަލް އާދަމް މޫސާ އާއި އޭއީސީގެ ޕްރިންސިޕަލް ޒިޔާދު ރަޝާދުވެސް ވަނީ ވާހަކަ ދައްކަވާފަ އެވެ. މިގޮތުން 2 ބޭފުޅުންގެ ވާހަކައިގައިވެސް ފެތުމުގެ މުހިއްމުކަމުގެ މައްޗަށް އަލިއަޅުވާލާ ވާހަކަ ދެއްކެވި އެވެ.

މި ޕްރޮގްރާމުގައި އޭއީސީގެ 105 ދަރިވަރުންނާއި އަފީފުއްދީންގެ 69 ދަރިވަރަކު ވަނީ ބައިވެރިވެފައެވެ. އަދި މިކުދިންނަށް ދެވުނު ފައިނަލް ޓެސްޓުގައި 25 މީޓަރަށް ފެތިފައިވާނަމަ ފަތަން ދަސްވެފައިވާކަމަށް އެމްއެންޑީއެފުން ވަނީ ކަނޑައަޅާފައެވެ. މީގެ އިތުރުން 19 ދަރިވަރަކު 1000 މީޓަރަށް ފަތާފައިވާކަންވެސް އެފަރާތުން ހާމަކުރައްވައެވެ.

މި ޕްރޮގްރާމު ކުރިއަށްދިޔައީ ހުސްވި ފެބްރުއަރީ މަހުގެ 23 އިން މިމަހުގެ 11 ގެ ނިޔަލަށެވެ.