އަމިއްލަ ފަރާތަކުން ކުޅުދުއްފުށީގައި ބޯޑިން ހޯމްގެ ހިދުމަތް ދޭން ފަށައިފި

އަމިއްލަ ފަރާތަކުން ކުޅުދުއްފުށީގައި “ގްރީން ބޯޑިން ހޯމް” ގެ ނަމުގައި ބޯޑިން ހޯމް އެއްގެ ހިދުމަތް ދޭން ފަށައިފި އެވެ.

ތަޢުލީމީ ދާއިރާގައި ޚިދުމަތްކޮށް، އެދާއިރާގެ ތަޖްރިބާ ލިބިފައިވާ  ފ.ނިލަންދޫ އިޤްބާލް ޙަމީދު ހިންގާ މި ބޯޑިން ހޯމް އާބެހޭގޮތުން މިނޫހަށް މައުލޫމާތު ދެއްވަމުން ވިދާޅުވީ، ނިމިދިޔަ ހަފްތާގެ ބުރާސްފަތި ދުވަހާ ހަމައަށް 3 ކުދިން އެންރޯލް ވެފައިވާ ކަމަށާއި އިތުރު ބެލެނިވެރިން ވެސް ފޯމް ނަގާފައި ވާކަމަށެވެ.

ކުޅުދުއްފުށީގައި މި ފެށުނު ގްރީން ބޯޑިން ހޯމްގެ ޚިދުމަތަކީ މައިންބަފައިންގެ އަޅާލުމުގެ އިތުރަށް ދަރިވަރުންނަށް އިތުރު ބެލެހެއްޓުންތެރިކަމެއް ފޯރުކޮށްދީ އެކުދިންގެ ތަޢުލީމީ ޙަޔާތް ރަގަޅުގޮތުގައި ނިންމުމަށް އެހީތެރިވުމުގެ ގޮތުން ފޯރުކޮށްދޭ ޚިދުމަތެކެވެ. މިގޮތުން ކުދިންގެ ކިޔެވުމަށް ބޭނުންކުރާ ފޮތްތައް ބަލައި ފިލާވަޅުތައް ހަމަކުރުވައި އިތުރު އެހީ ފޯރުކޮށްދިނުމާއި،  ބަލަހައްޓާ މީހަކާ އެކު ކޮންމެ ވަގުތެއްގައި ޖަމާޢަތުގައި މިސްކިތުގައި ނަމާދު ކުރުވުމާއި، ދަރިވަރުންނަށް ފިލާވަޅު ދަސްކުރުމުގައި އެހީތެރިކަން ފޯރުކޮށްދީ އިމްތިޙާން ތަކަށް ދަރިވަރުން ތައްޔާރުކޮށްދިނުމުގެ އިތުރުން ދަރިވަރު އުޅުން އަބަދުމެ ރަގަޅުގޮތުގައި ބެލެހެއްޓުމަށް މައިންބަފައިންނަށް އެހީތެރިކަން ފޯރުކޮށް ދިނުންވެސް ހިމެނޭނެކަމަށް ބޯޑިން ހޯމުން މައުލޫމާތު ދެއްވައެވެ.

މި ހޯމްގެ ސަބަބުން ދަރިވަރުން އޯލެވެލް ނިމިގެންދާއިރު ރަނގަޅު ތަޢުލީމެއް ލިބި ކުރިޔަށް ދާނެ ރޮނގަކާއި މެދު ރަނގަޅު މަޢުލޫމާތު ލިބިފައި ތިބި ބަޔެއް ކަމުގައިވެގެން ދާނެކަމަށާއި މުޖުތަމައުތަކުގައި ހިނގާ ނޭދެވޭ ކަންތައްތަކާއި ދުރުގައި ކިޔެވުން ނިމެންދެން އުޅުމުގެ ފުރުޞަތު ލިބި ގެންދާނެ ކަަމަށް އިގްބާލު ވިދާޅުވި އެވެ.

މި ބޯޑިން ހޯމުގައި ތިބޭ ކުޅުދުއްފުށީ ދަރިވަރުންގެ އެންރޯލްމަންޓް ފީއެއްގެ ގޮތުން 1000 ރުފިޔާ ހަމަޖެހިފައިވާއިރު  މަހު ފީއަކީ 1500 ރުފިޔާ އެވެ.  އަދި އެހެން ރަށްރަށުގެ ދަރިވަރުންގެ އެންރޯލްމަންޓް ފީއަކަށް 2000 ރުފިޔާ ހަމަޖެހިފައިވާއިރު  މަހު ފީއަކީ 3000 ރުފިޔާ އެވެ.

ގްރީން ބޯޑިން ހޯމް ހިނގަމުންދާނީ ކުޅުދުއްފުށީ މަތިވަރު ގޭގައެވެ.