ތިރީސް އަހަރުވެސް، 3 އަހަރުވެސް އަދި މިހާރުވެސް މަސައްކަތް ކުރަނީ ހިރިމަރަދޫ ރައްޔިތުންނަށް އޮޅުވާލަން: ޒަކަރިއްޔާ ހަސަން

ވޭތުވެދިޔަ 30 އަހަރާއި 3 އަހަރާއި އަދި މިހާރުގެ ސަރުކާރުންވެސް މަސައްކަތްކުރަމުންދަނީ ހިރިމަރަދޫ ރައްޔިތުންނަށް އޮޅުވާލުމަށްކަމަށް ހދ އަތޮޅު ކައުންސިލުގެ ނޮޅިވަރަމް ދާއިރާގެ މެމްބަރު އަދި އެކައުންސިލުގެ ނައިބު ރައީސް ޒަކަރިއްޔާ ހަސަން ވިދާޅުވެއްޖެ އެވެ.

ކައުންސިލަރ ޒަކަރިއްޔާ މިހެން ވިދާޅުވީ ހދ ހިރިމަރަދޫ ބަނދަރުގެ މައްސަލައިގައި އެރަށު ކައުންސިލް އިދާރާ ބަންދުކޮށްގެން މުޒާހަރާ ކުރަމުންދާ ރައްޔިތުންނާ ބައްދަލުކޮށް ވާހަކަ ދައްކަވަމުންނެވެ. ޒަކަރިއްޔާ ވިދާޅުވީ އާބާދީ މަދުވުމަކީ ބަދުނަސީބެއް ނޫންކަމަށާއި އާބާދީ މަދުވުމަކުން ލިބެންޖެހޭ އަސާސީ ހައްގެއް އުނިވެގެން ނުވާނެ ކަމަށެވެ.

ޑީއާރުޕީ ދޫކުރައްވާ އެމްޑީޕީއާ ގުޅިވަޑައިގެން ކުރީ ސަރުކާރު ތަކުގެ ސިޔާސަތުތަކަށް ފާޑުވިދާޅުވަމުން ގެންދަވާ ޒަކަރިއްޔާ ވިދާޅުވީ، ހަގީގަތުގައި ބޭނުން ވަނީ ބޭސް ސިޓީ އަށް ސަލާމް ނުޖަހާ، ސިޔާސީ ފަރާތަކަށް ސަލާމް ޖަހަންދާ ނުޖެހި، އަބުރުވެރި ދިރިއުޅުމެއް އުޅޭ ބަޔަކަށްވުމަށް ކަމަށެވެ. އަދި ހިރިމަރަދޫގައި ކުރާ އިޙްތިޖާޖަކީ ސިޔާސީ ކަމެއް ނޫން ކަމަށް ވިދާޅުވި އެވެ.

“ބޭނުމީ ބަނދަރެއް” މިނަމުގައި އިއްޔެ ހަވީރު 4 ޖެހިއިރު ވަނީ ރަށުގެ ރައްޔިތުންނާއި އިއްޔެ އެރަށަށް ދިޔަ އަތޮޅުގެ އެހެން ރަށްށުގެ މީހުންނާއެކު ސުލުހަވެރި މުޒާހަރާ އެއް އެރަށުގެ ބޮޑެތި މަގުތަކުގައި ކޮށް އަޑު އުފުލާ ރައީސް ވަހީދު، ހައުސިން މިނިސްޓަރ މުއިއްޒުގެ އިތުރުން ދާއިރާގެ މެމްބަރު މުޖްތާޒުގެ އިސްތިއުފާ އަށް ގޮވާފައި އެވެ.

ހދ ހިރިމަރަދޫ ބަނދަރު ނުހެދި ދިގުލައި ދާތީ އެރަށު ރައްޔިތުން ކައުންސިލް އިދާރާ ކުރިމަތީ ގައި އިހްތިޖާދު ކުރާތާ މިއަދަށް 13 ދުވަސް ވެފައި ވާއިރު އެރަށު ރައްޔިތުނާއި އެކު ތިބި ކަން ހާމަކޮށް ދިނުމުގެ ގޮތުން ހދ ކުޅުދުއްފުއްޓާއި ފިނޭ އަދި ނޮލިވަރަމުގެ ރައްޔިތުންތަކެއް ވަނީ މިއަދު އެރަށު ރައްޔިތުން ކުރަމުން ގެންދާ އިހުތިޖާޖުގައި ބައިވެރިވެފައެވެ.

އާބާދީގައި 500 އެއްހާ މީހުން ދިރިއުޅެމުން އަންނަ ހދ ހިރިމަރަދޫ އަކީ މިއަތޮޅުގައި ބަނދަރެއް ނެތް ހަމައެކަނި ރަށެވެ. ބަނދަރެއް ނެތުމުން ރަށުގެ ރައްޔިރުންނަން ދަނީ ބޮޑެތި ދަތިތަކާއި ކުރިމަތިލަމުންނެވެ.