ކުޅުދުއްފުށީގައި ވަރަށް ފޯރިއާއެކު އާރތް އަވާ ފާހަގަކޮށްފި

މިއަހަރު އާއްމުކޮށް ކޮންމެ ރެޔަކު ކަރަންޓް ބޭނުންކުރާ މިންގަނޑަށްވުރެ 89 ކިލޯވޯޓު މިފާހަގަކުރި 1 ގަޑި އިރުގެ ތެރޭގައި ދަށްކުރެވިފައިވޭ

ހދ ކުޅުދުއްފުށީގައި ވަރަށް ފޯރިއާއެކު މިއަހަރުގެ އާރތް އަވަރ ފާހަގަކޮށްފި އެވެ.

ކުޅުދުއްފުށީގައި މިރޭ އާރތް އަވާ ފާހަގަ ކޮށްފައި ވަނީ ދި ޔޫތް މޫވްމެންޓްގެ ފަރާތުން އިންތިޒާމު ކޮށްގެން މިރޭ ކުޅުދުއްފުށީ ރަސްމީ ބޯޅަދަނޑު (ޒިގްޒެގް ދަނޑު) ގައެވެ. އަދި ކުޅުދުއްފުށީގެ ގިނަ ގެތަކުން ވަނީ އެވަގުތުގައި ދިއްލުންތައް ނިއްވާލާފަ އެވެ.

މިހަރަކާތް ކުރިއަށްދިޔަ ވަގުތު އެތަނަށް ހާޒިރުވި ބައިވެރިން އުއްބަތި ހިފައިގެން ތިބިއިރު ކުޅުދުއްފުށީ މިސްގާލް ބޮޑުބެރު ގުރޫޕުގެ ހަރަކާތްތައް ކުރިއަށްދިޔައެވެ. އަދި ޖަލާލުއްދީން ސްކޫލު ދި ޔޫތު މޫވްމެންޓްގެ ފްލޭޝް މޮބެއްވެސް ފެނިގެންދިޔަ އެވެ.

މިރޭ 8:30 އިން 9:45 އަށް ނިޔަލަށް ކުރިއަށްދިޔަ މި ހަރަކާތްތަކުގެ ތެރެއިން ބައެއް ފަރާތްތަކުގެ ޝުއޫރު ފާޅުކުރުންވެސް ކުރިއަށް ގެންގޮސްފައި ވެއެވެ.

ފެނަކަ ކޯޕަރޭޝަންގެ ކުޅުދުއްފުށީ އިންޖީނުގެއިން މައުލޫމާތު ދެއްވާ ގޮތުގައި މިއަހަރު އާއްމުކޮށް ކޮންމެ ރެޔަކު ކަރަންޓް ބޭނުންކުރާ މިންގަނޑަށްވުރެ 89 ކިލޯ ވޯޓުގެ ކަރަންޓު މިފާހަގަކުރި 1 ގަޑި އިރުގެ ތެރޭގައި ދަށްކުރެވިފައިވެ އެވެ.

މިރޭގެ މި ހަރަކާތްތަކާއި ގުޅޭގޮތުން ދި ޔޫތު މޫވްމެންޓްގެ މެމްބަރަކު ވިދާޅުވީ އެފަރާތުން މިކަން އަމާޒު ކުރީ ގާތްގަނޑަކަށް 500 މީހުން ބައިވެރިވާނޭ ކަމަށް ބަލާފައި ކަމަށެވެ. އަދި 1 ގަޑި އިރުގެ ތެރޭގައި ކަރަންޓް ބޭނުންކުރާ މިންވަރު ވަރަށް ބޮޑަށް ދަށް ކުރެވިފައިވާކަން އެ ޖަމިއްޔާއިން ބުނެއެވެ.

“އަޅުގަނޑުމެން އަމާޒުކުރީ 500 މީހުންނަށް. އަމާޒު ފުރިހަމަ ވެސް ވެއްޖެ. އެއީ އަޅުގަނޑުމެން ތައްޔާރުކުރީ 400 އެއްހާ އުއްބައްތި ނާށީގަ. ހުރިހާ އެއްޗެއް ހުސްވި. އުއްބައްތި ނުލާވެސް ވަރަށް ގިނަ ފަރާތްތައް ތިއްބެވި.” ޑީވައިއެމްގެ މެމްބަރ ވިދާޅުވި އެވެ.

ދި ޔޫތު މޫވްމެންޓުން ބުނީ މި ހަރަކާތް ފުރިހަމައަށް ކުރިއަށްގެންދިޔުމަށް ސްޕޮންސަރ ދެއްވި ވަތަނިއްޔާއަށް ޝުކުރުއަދާ ކުރައްވާ ކަމަށެވެ. އަދި އެކިގޮތްގޮތުން ވެދެއްވި އެހީތެރިކަމަށް ކުޅުދުއްފުށީ ކައުންސިލަށާއި ކުޅުދުއްފުށި ޕޮލިސް ސްޓޭޝަނަށް ދި ޔޫތު މޫވްމެންޓްއިން ވަނީ ޝުކުރު އަދާކޮށްފައި އެވެ. އޭގެ އިތުރުން އެމްއެންޑީއެފް ފަޔަރ އެންޑް ރެސްކިއުއަށާއި ޒިގްޒެގް ފޯރ އޯލް ޔޫތު ލިންކޭޖް، މިސްގާލް ބޮޑުބެރު ގުރޫޕް، ޖަލާލުއްދީން ސްކޫލުގެ އިކޯ ކްލަބް، އަދި ކުޅުދުއްފުށީ ކޮރަލްސް އަށް ވަރަށް ބޮޑަށް ޝުކުރު އަދާކުރާ ކަމަށް އެ ޖަމިއްޔާއިން ބުނެއެވެ.

މިއަހަރުގެ އާރތް އަވަރގެ ޝިއާރަކީ “ގޯ ބިޔޯންޑް އާރތް އަވަރ” އެވެ. އާރތު އަވަރ އާބެހޭ މަޢުލޫމާތު ދީ ރައްޔިތުން ހޭލުންތެރިކުރުމަށް ޖަލާލުއްދީން ސްކޫލުގެ ދަރިވަރުން މިދިޔަ ހޮނިހިރު ދުވަހު ވަނީ ދޮރުން ދޮރަށް ކެމްޕެއިންއެއް ކޮށްފަ އެވެ.

[yass cats=17]

އިވެންޓްގެ އިތުރު ފޮޓޯތައް ކުޅުދުއްފުށި އޮންލައިން ފޭސްބުކް ޕޭޖްގައި