ކުޅުދުއްފުށީ ސްކޫލުތަކުގެ ޓީޗަރުންނަށް ފިޒިކަލް އެޑިއުކޭޝަނާބެހޭ ވޯކްޝޮޕެއް ބާއްވައިފި

ކުޅުދުއްފުށީ ސްކޫލުތަކުގެ ޓީޗަރުންނަށް ފިޒިކަލް އެޑިއުކޭޝަނާބެހޭ ވޯކްޝޮޕެއް ބާއްވައިފި އެވެ.

“ބަރާބަރު ޓައިކު”ގެ ނަމުގައި ކުރިއަށް ގެންދިޔަ މި ވޯކްޝޮޕާބެހޭ ގޮތުން މިނޫހަށް މައުލުމާތު ދެއްވަމުން ޕީއީ އެޑްވައިޒަރ ހިދެމީ ސެނޫ ވިދާޅުވީ މި ވޯކްޝޮޕަކީ ދަރިވަރުންނަށް ނަގައިދެވޭ  ޕިޒިކަލް އެޑިއުކޭޝަން ގަޑިތަކުގެ ފެންވަރު ރަނގަޅު ކުރުމުގެ މަގުޞަދުގައި ކުރިއަށް ގެންދިޔަ ވޯކްޝޮޕެއް ކަމަށެވެ.

ކުޅުދުއްފުށީގެ 2 ޕްރީ ސްކޫލަށާއި ޕްރައިމަރީ ސްކޫލުތަކަށް އަމާޒުކޮށްގެން ކުރިއަށްގެންދިޔަ ވޯކްޝޮޕްގައި ތިޔަރީ ގަޑިތައް ކުރިއަށް ގެންގޮސްފައިވަނީ ހދ އަތޮޅު ތައުލީމީ މަރުކަޒު (އޭއީސީ)ގެ ޓީޗަރ ރިސޯސް ސެންޓަރުގައެވެ. އަދި ޕްރެކްޓިކަލް ގަޑިތައް ނަގައިދީފައިވަނީ އޭއީސީގެ ކުޅޭ ބިމުގައި އެވެ.

މި ވޯކްޝޮޕްގައި ފުޓުބޯޅައިގެ ހުނަރުތަކާއި، ޖިމްނާސްޓިކްގެ ހުނަރު ތަކާއި، ލޯންގް ރޯޕާއި، ސްކިޕިން ރޯޕް ފަދަ ތަކެތި ބޭނުންކުރަންވީ ރަނގަޅު ގޮތްތައް ވަނީ ބުނެދީފައެވެ. އަދި ނަމޫނާ ލެސަންއާއި ނާސަރީ ރައިމްސް އަދި އެކްޝަން ލަވަވެސް ދަސްކޮށްދީފައިވެއެވެ.

މި ވޯކްޝޮޕްގައި  ބައިވެރިވި އަފީފުއްދީން ސްކޫލުގެ ޓީޗަރެއް ވިދާޅުވީ މިއީ ޕީއީ ކިޔަވައިދޭން އަލަށް ފެށި މުދައްރިސެއްގެ ހައިސިއްޔަތުން ވަރަށް ބޭނުންތެރި ވޯކްޝޮޕެއް ކަމަށާއި ބޭނުންތެރި އެތައް މައުލޫމާތެއް ލިބިގެން ގޮސްފައިވާ ކަމަށެވެ. އަދި މި ވޯކްޝޮޕްގެ ބައިވެރިއަކަށް ވުމުގެ ފުރުސަތު ލިބުމުން ވަރަށް ހިތަހަމަ ޖެހޭކަމަށްވެސް ވިދާޅުވިއެވެ.

ހުސްވި ހަފްތާ ބަންދުގައި ކުރިއަށްގެންދިޔަ މި ވޯކްޝޮޕްގައި ކިޔަވައިދެއްވީ ޓީޗަރ އަލީ ޝަރިފާއި ހިދެމީގެ އިތުރުން 5 ވޮލަންޓިއަރުންނެވެ. ކުޅުދުއްފުއްޓަކީ ޕީއީ ވަރަށް ފުރިހަމައަށް ކިޔަވައިދެވޭ ރަށެއްކަމަށް އެހެން ރަށްރަށުން ވަޑައިގެންނެވި ވޮލަންޓިއަރުން ވިދާޅުވެފައިވާ ކަމަށް އޭއީސީން މައުލޫމާތު ދެއްވައެވެ.

މި ވޯކްޝޮޕްގައި 4 ސްކޫލުން 27 ބައިވެރިންވަނީ ބައިވެރިވެފައެވެ. މިއީ ބަރާބަރު ޓައިކު ގެ ނަމުގައި ކުޅުދުއެްފުށީގައި ވޯކްޝޮޕެއް ބޭއްވުނު 2 ވަނަ ފަހަރެވެ.