އަމިއްލަ ފަރާތަކުން ކުޅުދުއްފުށީ ރީޖަނަލް ހޮސްޕިޓަލަށް ދެ ޑައިލެސިސް މެޝިން ހަދިޔާ ކޮށްފި

ރާއްޖޭގައި މެޑިކަލް ސަޕްލައި ވިއްކާ ކުންފުންޏެއްކަމުގައި މެޑިކޮމް ޕްރައިވެޓް ލިމިޓެޑްގެ ފަރާތުން ކުޅުދުއްފުށީ ރީޖަނަލް ހޮސްޕިޓަލްގެ ޑައިލެސިސް ސެންޓަރަށް ދެ ޑައިލެސިސް މެޝިން ހަދިޔާ ކޮށްފި އެވެ.

މިނޫހަށް މައުލޫމާތު ލިބިފައިވާ ގޮތުގައި މި ދެ މެޝިން ހަދިޔާ ކުރައްވާފައިވާ މެޑިކޮމްއިން އެކުންފުނީގެ ވޮރަންޓީގައި މެޝިން ހުންނަ މުއްދަތުގައި މެއިންޓެނަންސްގެ މަސައްކަތްތައް ބަލަހައްޓާދޭނެ އެވެ.

ކުޅުދުއްފުށީ ރީޖަނަލް ހޮސްޕިޓަލްގައި ތަރައްޤީ ކުރުމުންދާ ޑައިލެސިސް ސެންޓަރުގައި  މި މެޝިން ތައް އިންސްޓޯލްކޮށްފައި ވާއިރު  އަލަށް ޤާއިމްކުރެވޭ 6 އެނދުގެ އައި.ސީ.ޔޫއަށް ބޭނުންވާ މެޝިނަރީ ހޯދުމުގެ މަސައްކަތް ކުރިއަށްދާ ކަމަށް މައުލޫމާތު ލިބެ އެވެ.

ޑައިލެސިސް ސެންޓަރާއި އައު އައި.ސީ.ޔޫ އެކުއެކީގައި ހުޅުވޭއިރު އެތަނަށް ބޭނުންވާ ގިނަ މެޝިންތަކެއް މިހާރު ލިބިފައިވާ ކަމަށް ހޮސްޕިޓަލްގެ އޮފިޝަލެއް ހާމަކުރި އެވެ.