އެމްޑީޕީގެ ކުޅުދުއްފުށީ ދެކުނު ދާއިރާގެ ސެކެޓްރީއަކަށް އާދަމް މުހައްމަދު އިންތިހާބުކޮށްފި

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކުޅުދުއްފުށީ ދެކުނު ދާއިރާގެ ސެކެޓްރީއަކު ހޮވުމަށް މިއަދު ބޭއްވި އިންތިހާބު އާދަމް މުހައްމަދު (ޖޭވިޑް) ކާމިޔާބު ކޮށްފިއެވެ.

އާދަމް މުހައްމަދު އިންތިހާބު ކާމިޔާބު ކޮށްފައިވަނީ އޭނަ އާއި އެކު އެމަގާމަށް ވާދަކުރި ކުޅުދުއްފުށީ ސީނިޔާޒް، އާދަމް ޝަރީފް މުހައްމަދުގެ މައްޗަށް 60 ވޯޓުގެ ތަފާތަކުންނެވެ. އާދަމް މުހައްމަދަށް ޖުމްލަ 144 ވޯޓު ލިބުނުއިރު އާދަމް ޝަރީފަށް ލިބިފައިވަނީ 84 ވޯޓެވެ.

މިއަދު މެންދުރު ފަހު ކުރި އަށް ދިޔަ މި އިންތިހާބުގައި 2 ވޯޓު ފޮޓެއް ބަހައްޓާފައި ވެއެވެ. އޭގެ ތެރެއިން ކުޅުދުއްފުށީގައި ބެހެއްޓުނު ވޯޓު ފޮއްޓަށް 209 މީހުން ވޯޓު ލައިފައިވާ އިރު އާދަމް މުހައްމަދަށް މި ފޮށިން ލިބިފައިވަނީ 124 ވޯޓެވެ. އާދަމް ޝަރީފަށް ލިބިފައިވަނީ 84 ވޯޓެވެ. އަދި މާލޭގައި ބެހެއްޓި ފޮއްޓަށް ވޯޓު ލައިފައިވަނީ އެންމެ 21 މީހުންނެވެ. އެ ފޮށިން 20 ވޯޓު ޖޭވިޑް ހޯދައިފައިވާ އިރު އާދަމް ޝަރީފަށް އެފޮށި  އެންމެ ވޯޓެއްވެސް ނުލިބެ އެވެ. މިއަދުގެ އިންތިހާބުގައި، ކޮންމެ ފޮއްޓަކުން ވެސް 1 ވޯޓު ވަނީ ބާތިލްވެފައެވެ.

މިއިންތިހާބު ގައި ޖުމުލް 230 މީހުންވޯޓު ލައިފަވައި ވާއިރު ދެކުނު ދާއިރާގެ އެމްޑީޕީގެ ރަޖިސްޓްރީ ގައި 566 މީހުން ތިބެއެވެ.