މޯލްޑިވްސް އިންލެންޑް ރެވެނިޔު އޮތޯރިޓީ (މީރާ) އިން ކުޅުދުއްފުށީގައި ހުޅުވި އޮފީހަށް މިދިޔަ އަހަރު އެއް ލައްކައަށްވުރެ ގިނަ ރުފިޔާ ލިބިފައިވާ ކަމަށް މީރާއިން ބުނެފި އެވެ.
ކުޅުދުއްފުށި އޮންލައިނަށް މައުލޫމާތު ދެއްވަމުން މީރާއިން ބުނެފައިވަނީ ހުސްވި އަހަރުގެ ނޮވެމްބަރު 28 ވަނަ ދުވަހުން ފެށިގެން 31 ޑިސެމްބަރުގެ ނިޔަލަށް 119494 ރުފިޔާ ލިބިފައިވާ ކަމަށެވެ.
މީރާގެ ކުޅުދުއްފުށީ ބްރާންޗްއިން ފައިސާ ބަލައިގަންނަން ފެށި ހިސާބުން ފެށިގެން އެއަހަރުގެ ނިޔަލަށް ފާއިތުވި އެއް މަސްދުވަހުގެ ތެރޭގައި އެންމެ ބޮޑު އާމްދަނީއެއް ލިބިފައިވަނީ މޮޓޯރ ވެހިކަލް ލައިސަންސް ފީ އިންނެއެވެ. އެގޮތުން މޮޓޯރ ވެހިކަލް ލައިސަންސް ފީގެ ގޮތުގައި ޖުމްލަ 70232 ރުފިޔާ ލިބިފައިވެއެވެ.
މީރާގެ ކުޅުދުއްފުށީ ބްރާންޗަށް މިދިޔަ އަހަރުގެ ތެރޭގައި ދެވަނަ އަށް އެންމެ ގިނަ ފައިސާ ލިބިފައިވަނީ އެކިއެކި ޖޫރިމަނާތަކުންނެވެ. ޖޫރިމަނާގެ ގޮތުގައި 17545 ރުގިޔާ ލިބިފައިވެއެވެ.
ޖީއެސްޓީގެ ގޮތުގައި މިދިޔަ އަހަރު އެ އޮފީހަށް ލިބިފައިވަނީ 14057 ރުފިޔާ އެވެ. އަދި ދަނޑުވެރިކަމަށް ދޫކޮށްފައިވާ ރަށްރަށުގެ ކުލީގެ ގޮތުގައި 5400 ރުފިޔާ ލިބުނުއިރު 5260 ރުފިޔާ، މަސްވެރިކަން ނުކުރާ އިންޖީނުލީ ތަކެތީގެ ފީގެ ގޮތުގައި ލިބިފައިވެއެވެ. އަދި ކުންފުނިތަކުގެ އަހަރީ ފީގެ ގޮތުގައި 4500 އާއި ވިސާ ފީގެ ގޮތުގައި 2500 ރުފިޔާ ލިބިފައިވެއެވެ.
މިދިޔަ އަހަރު 7 ބިލިއަނަށްވުރެ ގިނަ ރުފިޔާ މީރާއަށް އާމްދަނީގެ ގޮތުގައި ލިބިފައި ވެއެވެ. މީރާއިން ކުރިން ބުނެފައިވާ ގޮތުގައި ކުޅުދުއްފުށިގައި އެ އޮތޯރިޓީގެ އޮފީހެއް ހުޅުވުމުން އެންމެ އުތުރުގެ ރައްޔިތުންނަށް ލުއިފަސޭހަތަކެއް ލިބިގެންދާނެއެވެ.