ބިލްތަކަށް އަމިއްލައަށް ފައިސާ ދެއްކޭނެ މެޝިންއެއް ވަތަނިއްޔާ އިން ކުޅުދުއްފުށީގައި ބަހައްޓައިފި

ވަތަނިއްޔާ އިން ކުޅުދުއްފުށީގައި ވަތަނިއްޔާގެ ބިލްތަކަށް އަމިއްލައަށް ފައިސާ ދެއްކޭނެ މެޝިންއެއް ބަހައްޓައިފި އެވެ.

ކުޅުދުއްފުށީގައި ހުންނަ ވަތަނިއްޔާގެ އެކްސްޕީރިއެންސް ސެންޓަރުގައި ބެހެއްޓި ޓަޗްސްކްރީން ސެލްފްޕޭމަންޓް ކިއޮސްކު މެދުވެރިކޮށް ވަތަނިއްޔާގެ ކަސްޓަމަރުންނަށް ވަގުތުން ފޯނު ރީޗާޖް ކުރުމާއި ބިލް ދެއްކުމުގެ ޚިދުމަތް ލިބިގެންދާނެ އެވެ.

ރާއްޖޭގައި ފުޅާދާއިރާއެއްގައި މުވާސަލާތީ ޚިދުމަތްދޭ ކުންފުނި ވަތަނިއްޔާ އިން ކިއޯސްކްގެ އެހީގައި ފައިސާ ދައްކަން ބޭނުންވާ ނަންބަރު ޖައްސަވައި، ރިޗާޖް ކުރުމަށް ނުވަތަ ބިލު ދެއްކުމަށް އިހުތިޔާރު ކުރުމަށް ފަހު، ފައިސާލުމަށް ކަނޑައަޅާފައިވާ ކޭޝް ކަލެކްޓާ އަށް ފައިސާ ލުމުން ޕޭމަންޓް ޕްރޮސެސްވެ، ފައިސާ ދެއްކުނު ކަމުގެ ރަޝީދު ލިބިގެން ދެއެވެ.

ވަތަނިއްޔާ އެކްސްޕީރިއަންސް ސެންޓަރުން މި ޚިދުމަތް ލިބިގެންދާއިރު 5ރ. ރުފިޔާއި، 10ރ. އާއި 20ރ. އާއި 50ރ. އަދި 100ރ. އަދަދުތައް މި މެޝިނުން ބަލައިގަންނާނެ ކަމަށް ވަތަނިއްޔާ އިން މަޢުލޫމާތު ދެއެވެ.

ވަތަނިއްޔާ އިން އިއްޔެ ވަނީ ފޯސީޒަންސް ކުޑަ ހުރާ ލަނޑާގިރާވަރު ރިސޯޓްގައި ވެސް ސެލްފްޕޭމަންޓް ކިއޮސްކެއް ބަހައްޓާފަ އެވެ. އަދި މިދިޔަ އަހަރުގެ ސެޕްޓެމްބަރު މަހު އެކުންފުނިން ވަނީ މާލޭ މަޖީދީމަގުގައި ހުންނަ އެކްސްޕީރިއެންސް ސެންޓަރުގައި ވެސް ކިއޮސްކެއް ބަހައްޓާފައެވެ.