ހދ އަތޮޅު ޤުރުއާން ކިޔެވުމުގެ މުބާރާތުގެ ރަންވަނަތައް މަކުނުދޫ ސްކޫލަށް

ގައުމީ ޤުރުއާން ކިޔެވުމުގެ މުބާރާތަށް ދަރިވަރުން ހޮވުމަށްޓަކައި ކުޅުދުއްފުށީގައި ބޭއްވި ހދ އަތޮޅު ޤުރުއާން ކިޔެވުމުގެ މުބާރާތުގެ ރަންވަނަތައް ހދ. މަކުނުދޫ ސްކޫލުން ހޯދައިފި އެވެ.

މިއަދު ނިމުނު ހދ އަތޮޅު ޤުރުއާން ކިޔެވުމުގެ މުބާރާތުގައި ޖުމްލަ 13 ސްކޫލަކާ ވާދަކޮށް މުޅި މުބާރާތުން އެއްވަނަ ހޯދީ ހދ. މަކުނުދޫ މަދަރުސާ އެވެ. އަދި މުޅި މުބާރާތުން ނުބަލާ ކިޔެވި އެންމެ މޮޅު 3 ދަރިވަރުންނަކީ ވެސް އެސްކޫލުގެ ދަރިވަރުންނެވެ. މީގެ އިތުރުން ބަލައިގެން ކިޔެވުމުގެ ބައިގެ އެންމެ މޮޅު ތިން ދަރިވަރުންގެ ތެރޭގައި ވެސް އެސްކޫލުގެ ދަރިވަރަކު ހިމެނިފައިވާއިރު، ބަލައިގެން ކިޔެވުމުގެ ބައިންނާއި ނުބަލައި ކިޔެވުމުގެ ބައިން އެންމެ މޮޅު ސްކޫލަކަށް ހޮވިފައިވަނީ ވެސް ހދ. މަކުނުދޫ ސްކޫލެވެ.

138 ދަރިވަރުންނާއެކު ކުރިއަށްދިޔަ މި މުބާރާތުގެ ބަލައިގެން ކިޔެވުމުގެ ބައިން މުޅި މުބާރާތުން އެއްވަނަ ހޯދާފައިވަނީ، ކުމުންދޫ ސްކޫލުގެ ރާއިދާ މޫސާ އެވެ. ދެވަނަ ހަނިމާދޫ ސްކޫލުގެ ޝައުފާ އާދަމް ހޯދިއިރު ތިންވަނަ ލިބިފައިވަނީ މަކުނުދޫ ސްކޫލުގެ އާމިނަތު ރާޔާ އެވެ.

ނުބަލައި ކިޔެވުމުގެ ބައިން މުޅި މުބާރާތުން އެއްވަނަ ހޯދާފައިވަނީ މަކުނުދޫ ސްކޫލުގެ މުހައްމަދު ފަޒީން އެވެ. ދެވަނަ ހޯދީ މަކުނުދޫ ނާރެސް ޕްރީ ސްކޫލުގެ ދަރިވަރު އާއިޝަތު އީލާފް އަލީ އެވެ. މިބައިން ތިންވަނަ ހޯދީ މަކުނުދޫ ސްކޫލުގެ މަރްޔަމް ރިފާ އެވެ.

މި މުބާރާތުން، މިއަހަރުގެ ގައުމީ ޤުރުއާން ކިޔެވުމުގެ މުބާރާތު ގައި ހދ އަތޮޅު ތަމްސީލް ކުރާނެ 15 ދަރިވަރަކު ވަނީ ހޮވާފައެވެ. އެ ދަރިވަރުންނަކީ މަކުނުދޫ ސްކޫލުގެ މިޒުހާ ހުސެއިނާއި ހަމަ އެސްކޫލުގެ މަރިޔަމް ރިފާ، މުހައްމަދު ފަޒީން، މަލަކާ މުހައްމަދު، ލަޔާން އަބުދުﷲ އާއި އާމިނަތު ރާޔާ އެވެ. އޭގެ އިތުރުން ހަނިމާދޫ ސްކޫލުގެ 2 ދަރިވަރަކު ހޮވިފައިވެއެވެ. އެއީ މަރިޔަމް ޝައުފާ އާއި ޝައުފާ އާދަމެވެ. އަދި މަޒީނާ މުހައްމަދާއި ނަޝްވާ އަބުދުލް އަޒީޒު ވަނީ ނޮޅިވަރަމް ސްކޫލުން ހޮވިފައެވެ. އަދި ނާރެސް ޕްރީ ސްކޫލުން އާއިޝަތު އީލާފް އަލީ އާއި ނައިވާދޫ ސްކޫލުން ރަހްމާ އަބުދުﷲ އާއި ކުރިނބީ ސްކޫލުން އާއިމިނަތު ޝަރާގެ އިތުރުން ކުމުންދޫ ސްކޫލުން  ރާއިދާ މޫސާ ވެސް ވަނީ ގައުމީ މުބާރާތަށް ހޮވިފައެވެ. އަދި ހދ އަތޮޅު މަދުރަސާގެ އަހުމަދު އަރުޝަމްވެސް ގައުމީ މުބާރާތަށް ހޮވިފައި ވެއެވެ.

މުބާރާތުގެ އެއްވަނަ މަކުނުދޫ މަދަރުސާ ހޯދިއިރު މި މުބާރާތުން ދެވަނަ ސްކޫލަށް ހޮވުނީ ވައިކަރަދޫ ސްކޫލެވެ. މުބާރާތްގެ 3 ވަނަ ކާމިޔާބު ކޮށްފައިވަނީ ހަނިމާދޫ ސްކޫލެވެ.

މިއަދު ހަވީރު ކުޅުދުއްފުށީ އަފީފުއްދީން ސްކޫލުގައި ބޭއްވި ހދ އަތޮޅު ޤުރުއާން މުބާރާތް ނިންމުމުގެ ރަސްމިއްޔާތުގައި އެއްވަނަ އަށް ދިޔަ މަގާމުތަކަށް ސެޓްފިކެޓާއި ޓްރޮފީ ބައްސަވައި ދެއްވީ މުބާރާތުގެ ޝަރަފުވެރި މެހެމާނު، ހދ އަތޮޅު ތައުލީމީ މަރުކަޒުގެ ޕްރިންސިޕަލް ޒިޔާދު ރަޝާދެވެ. ދެވަނައަށް ދިޔަ ފަރާތްތަކަށް އިނާމު ދެއްވީ އަފީފުއްދީން ސްކޫލުގެ ޕްރިންސިޕަލް އާދަމް މޫސާ އެވެ. އަދި ތިންވަނަ އަށް ދިޔަ ފަރާތްތަކަށް އިނާމު ހަވާލުކޮށްދެއްވީ ހދ. އަތޮޅު މަދަރުސާގެ ޕްރިންސިޕަލް ނާސިހާ އިދްރީސް އެވެ.

މިމުބާރާތު ގައި އެއްވެސް އުމުރު ފުރާ އަކުން ވަނައެއް ލިބިފައިނުވާ ސްކޫލު ތަކަކީ ހދ އަތޮޅު ތައުލީމީ މަރުކަޒާއި އަފީފުއްދީން ސްކޫލުގެ އިތުރުން ނެއްލައިދޫ ސްކޫލެވެ.