ކައުންސިލުގެ ނައިބު ރައީސް އިންތިހާބުކުރުމަށް ބޭއްވި ބައްދަލުވުން ހޫނުވެ، ކުރިއަށް ނުގެންދެވިގެން ހުއްޓާލައިފި

ހދ އަތޮޅު ކައުންސިލްގެ ނައިބު ރައީސްގެ މަގާމަށް މެމްބަރަކު އިންތިހާބުކުރުމަށް މިއަދު ބޭއްވި ޖަލްސާ ހޫނުވެ، ކުރިއަށް ނުގެންދެވިގެން ހުއްޓާލައިފި އެވެ.

އަތޮޅު ކައުންސިލުގެ ނައިބު ރައީސްގެ މަގާމުގައި ހުންނެވި ޒަކަރިއްޔާ ހަސަން އިސްތިއުފާ ދެއްވުމާ ގުޅިގެން މިއަދު އެ މަގާމަށް އެހެން މެމްބަރަކު އިންތިހާބުކުރުމަށް ބޭއްވި ޖަލްސާ ހޫނު ވާން ދިމާވީ ކުޅުދުއްފުށީ އުތުރު ދާއިރާގެ މެމްބަރެއް ކަމަށްވާ ނަސްރުﷲ އިސްމާއިލް ނިޒާމީ މައްސަލަ އެއް ނަންގަވައި ކައުންސިލްގެ ރައީސްގެ މަގާމު ވަނީ ނައިބު ރައީސް އާއި އެކު ހަމަވެފައިކަމަށް ވިދާޅުވެ ކައުންސިލްގެ ރައީސް މަގާމުން އިސްތިއުފާ ދޭން ޖެހޭނޭ ކަމަށް ވިދާޅުވުމުންނެވެ.

ހދ އަތޮޅު ކައުންސިލުން އަމަލުކުރަމުން އަންނަ އުޞޫލަކީ ކޮންމެ އަހަރަކު އެއްފަހަރު ރައީސާއި ނައިބު ރައީސްގެ މަގާމަށް އާ މެމްބަރަކު އިންތިހާބު ކުރުމެވެ. އެގޮތުން ކޮންމެ އަހަރަކުވެސް ރައީސާއި ނައިބު ރައީސް އިސްތިއުފާ ދެއްވުމަށްފަހު އެހެން ބޭފުޅަކަށް އެ ފުރުޞަތު ދެއެވެ.

މިއަދުގެ ޖަލްސާގައި ނަޞްރުﷲ އެގޮތަށް ވިދާޅުވުމުން އެހެން މެމްބަރުން ވެސް އެކަމަށް ތާއީދުކޮށް ވާހަކަ ދެއްކެވި އެވެ. އެމައްސަލައިގެ ޖަވާބުގައި  ކައުންސިލްގެ ރައީސް ހުސެން ރަޝީދު ވިދާޅުވީ ކައުންސިލުގައި މިއަދު އެޖެންޑާ ކޮށްފައިވާ ވަނީ ނައިބު ރައީސް ކަމުގެ މަގާމަށް މެމްބަރަކު އިންތިހާބު ކުރުމުގެ މަސައްލަ ކަމަށާއި އެކަން ކުރުމަށް ފަހު، ދެން ކުރިއަށް ހުރިކަންތަކާއި އެކު ދިއުމަށެވެ. އަދި ރައީސް ކަމުގެ މަގާމުން އިސްތިއުފާދެއްވާނެ ކަމަށް ވެސް މިހާރުގެ ރައީސް ހުސެން ރަޝީދު ވިދާޅުވި އެވެ.

މިއަދުގެ ޖަލްސާ ކުރިއަށް ނުގެންދިގެން ނިންމާލިއިރު، ކައުންސިލްގެ ބައެއް މެމްބަރުން ވަކިން ހާއްސަކޮށް އެމްޑީޕީއަށް ނިސްބަތްވެވަޑައިގަންނަވާ މެމްބަރުން ތަކުރާރުކޮށް ވިދާޅުވަމުން ގެންދެވީ ހދ އަތޮޅު ކައުންސިލްގެ ހިންގާ ގަވައިދުގައި ރައީސާއި ނައިބުރައީސް ކަމުގެ މުއްދަތަކީ މީލާދީ 1 އަހަރު ކަމުން، އެއްމުދަތު މިހާރު ހަމަވެފައިވާ ކަމަށެވެ. އަދި ރައީސާއި ނައިބު ރައީސްގެ މުއްދަތު ހަމަވާނީ އެކުއެކީގައި ކަމަށެވެ.

ކައުންސިލުގެ ނައިބު ރައީސް ކަމުގެ މަގާމުގައި ހުންނެވި ޒަކަރިއްޔާ ހަސަން، ކައުންސިލުގެ ހިންގާ ގަވާއިދުގައިވާ ގޮތުގެ މަތިން މިދިޔަ މަހު އިސްތިއުފާ ދެއްވި ގޮތަށް ރައީސް ވެސް އިސްތިއުފާ ދެއްވުމަށް އެމްޑީޕީގެ މެމްބަރުން ގޮވާލަމުން ގެންދެވިއެވެ. އަދި ކައުންސިލުގައި މީގެ ކުރިންވެސް އާންމުކޮށް ކުރިއަށް ގެންގޮސް ފައިވަނީ ނައިބު ރައީސް އާއި ރައީސްގެ މަގާމުގެ އިންތިހާބުތައް އެކުގައިކަމަން މެމްބަރުން ވިދާޅުވަމުން ގެންދެވި އެވެ.

މިއަދުގެ ޖަލްސާ ނިންމާލިއިރު މިމައްސަލައަށް ވަކި ގޮތެއް ނިމިފައެއް ނުވެއެވެ. އަދި އެމްސަލައިގައި ދެން ޖަލްސާއެއް އޮންނާނެ ދުވަހެއް އަންގާފައެއް ނުވެއެވެ. މިއަދު 10 ޖެހިއިރު ފެށި މިޖަލްސާގައި ކައުންސިލް ރައީސްއާ ބައެއް މެމްބަރުންނާ ދެމެދު ހޫނު ގަދަ ބަހުގެ ހަމަލާތަކެއް ވަނީ ބަދަލުކުރެވިފަ އެވެ.

މިހާރު ހުންނެވި ރައީސް އެ މަގާމަށް އިންތިހާބު ކޮށްފައިވަނީ 03 ސެޕްޓެމްބަރ 2012 ގައެވެ. މިހާރު ހުންނެވި ރައީސް ހުސެން ރަޝީދަކީ އެމްޑީޕީއަށް ނިސްބަވެވަޑައިގަންނަވާ ބޭފުޅެކެވެ.