ހދ އޭއީސީގައި ކާބޯތަކެތީގެ މައުރަޒެއް ބާއްވާ ބައިލައްކައަށްވުރެ ގިނަ ރުފިޔާ ހޯދައިފި

ހދ އަތޮޅު ތަޢުލީމީ މަރުކަޒުގައި މިއަދު ކާބޯތަކެތީގެ މައުރަޒެއް ބާއްވާ ބައިލައްކައަށްވުރެ ގިނަ ރުފިޔާ ހޯދައިފި އެވެ.

އެސްކޫލުން މަޢުލޫމާތު ދިން ގޮތުގައި މިއަދު ބޭއްވުނު މައުރަޒުން 64،475 ރުފިޔާ ވަނީ ލިބިފައެވެ.

މިއަދު ބޭއްވި މައުރަޒަކީ ވަރަށް ކާމިޔާބު މައުރަޒެއް ކަން ފާހަގަ ކުރައްވަމުން ޕީޓީއޭގެ ނައިބު ރައީސް މުނީރާ އަލީ ވިދާޅުވީ ހުރިހާ ސްޓޯލް ތަކަކުން ތަކެތި ވަނީ ހުސްވެފަކަމަށާއި މިމައުރަޒު މިހާ ކާމިޔާބު މައުރަޒަކަށް ވެގެންދިޔައީ ސްކޫލުގެ ބެލެނިވެރިންނާއި މުވައްޒަފުން އަދި ޓީޗަރުންގެ މިންނެއް މަސައްކަތުންކަމަށެވެ.

ޕީޓީއޭ ފަންޑަން ފައިސާ ހޯދުމަށް ކުރިއަށް ގެންދިޔަ މައުރަޒު ކުރިއަށް ގޮސްފައިވަނީ މިއަދު މެންދުރު ފަހު 2:00 އިން 5:00 އަށެވެ. މި މައުރަޒުގައި ތަފާތު ގިނަ ވައްތަރުގެ ދިވެހި ކާނާ އާއި މޭވާ، ތަރުކާރީގެ އިތުރުން އެކިވައްތަރުގެ ފޮނި ކާޖާ ވިއްކާފައި ވެއެވެ.

މި މައުރަޒުގައި އަފީފުއްދީން ސްކޫލުގެ ޕްރިންސިޕަލް އާދަމް މޫސާ އާއި ޑެޕިއުޓީ ޕްރިންސިޕަލް ސަމުސީރާ ޒަކަރިއްޔާ އާއި އަމީރު އަމީން ސްކޫލުގެ ސްޕަވައިޒަރ އައިޝަތު މުހަންމަދާއި ހދ އަތޮޅު ތަޢުލީމީ މަރުކަޒުގެ ކުރީގެ ޕްރިންސިޕަލް އިބްރާހިމް މުހައްމަދާއި ޖަލާލުއްދީން ސްކޫލުގެ ޑެޕިއުޓީ ޕްރިންސިޕަލް ޢަލީ އިސްމާއިލްގެ އިތުރުން ކައުންސިލް ގެ ރައީސް އިބްރާހިމް ރަމީޒު އާއި ކައުންސިލް މެމްބަރު ޖަމްޝީދު އަދި ކެޕްޓަން އާދިލް ވަނީ ބައިވެރިވެފައެވެ.

މިމައުރަޒުގެ އިތުރުން ޕީޓީއޭ ޕަންޑަ ފައިސާ ހޯދުމަށް މިއަހަރު ވަނީ ވިޔަފާރިވެރިންނާއި ގުޅިގެން ޓްރޭޑް ފެއާރ އަކާއި ޖަމްބަލް ސޭލެއް ބޭއްވުމަށް ނިންމާފަ އެވެ.

މައުރަޒުގެ ފޮޓޯތައް