ހަނިމާދޫ ސްކޫލުގައި ގުރޭޑް ދިހައެއްގެ ދަރިވަރުން އަމާޒު ކޮށްގެން ސްޓަޑީ ކޭމްޕެއް ބާއްވައިފި

ހަނިމާދޫ ސްކޫލުގެ މިއަހަރު އޯލެވެވް އިމްތިހާނަށް ތައްޔާރުވުމުގެ ގޮތުން ގުރޭޑް 10 ގެ ދަރިވަރުންނަށް އަމާޒު ކޮށްގެން ސްޓަޑީ ކޭމްޕެއް ބާއްވައިފި އެވެ.

ހަނިމާދޫ ސްކޫލާއި އެރަށު ޒުވާނުންގެ ޖަމިއްޔާ ގުޅިގެން ހިންގި މި ކޭމްޕާ ބެހޭ ގޮތުން ” ކުޅުދުއްފުށި އޮންލައިން” އާ ވާހަކަ ދައްކަމުން ހަނިމާދޫ ސްކޫލުގެ ޑެޕިއުޓީ ޕްރިންސިޕަލް އައިޝަތު ޝާދިޔާ ވިދާޅުވީ މިކޭމްޕްގެ މަގުސަދަކީ މިއަހަރު ޖީސީ އޯލެވެލް އިމްތިހާން ހަދާ ކުދިން އިތުރަށް ފިލާވަޅުތަކަށް އަހުލުވެރިކުރުން ކަމަށެވެ. އަދި މިފަހަރު ކުރިއަށް ދިޔައީ ހިސާބު މާއްދާ މުތޯލިޔާ ކުރުންކަމަށާއި އަދި ކުރިއަށް އޮތްތާގައި އެހެން މާއްދާ ތައް ކުރިއަށް ގެންދާ ގޮތަށް ހަމަޖެހިފަވާކަމަށެވެ.

ވޯކްޝޮޕެއް ގޮތަށް ކުރިއަށް ދިޔަ މި ކޭމްޕް ފެށުމުގެ ގޮތުން މިދިޔަ ބުރާސްފަތި ދުވަހު އޮތް ރަސްމިއްޔާތު ގައި ވަނީ ހަނިމާދޫގައި ގާއިމް ކުރެވިފައި ހުރި ސަރުކާރުގެ އޮފީސް ތަކުގެ އިސްވެރިން ބައިވެލައްވާ، ދަރިވަރުންނަށް ކިޔެވުމުގެ މުހިންމު ކަމާއި އަދި ތަޢުލީމު އުނގެނި ކުރިއަށް ދިއުމަށް ހިތްވަރު ދީފައެވެ.

ސްކޫލުން މަޢުލޫމާތު ދޭގޮތުގައި ކޮންމެ ދަރިވަރަކަށް ހާއްސަ ކޮށް ސެކެންޑް ޕޭރެންޓްގެ ގޮތުގައި މަސަކަތް ކުރައްވާނެ ދިވެހި ޓީޗަރެއް ނުވަތަ ޒުވާނުންގެ ޖަމިއްޔާގެ ތަޢުލީމީ ބޭފުޅަކު މިހާރު ވާނީ ހަމަ ޖައްސާފައެވެ. އަދި މާލީ ގޮތުންނާއި އެހެނިހެން ގޮތުން އެރަށުގެ ޒުވާނުންގެ ޖަމިއްޔާއިންނާއި ސާބަ އެކުވެރި ކުލަބުގެ ފަރާތުން ވެދެއްވާ އެހީތެރިކަން ފާހަގަ ކުރެއެވެ.

ހަނިމާދޫ ސްކޫލުގައި ގުރޭޑް 10 ގެ ތަޢުލީމް ހާސިލް ކުރަމުންދާ 19 ދަރިވަރުން އެބަތިއްބެވެ.