ރަމަޟާން މަހަށް ހުކުރު މިސްކިތުގައި އައު ސައުންޑް ސިސްޓަމެއް ޤާއިމް ކުރެވޭނެ: ކައުންސިލް ރައީސް

ރަމަޟާން މަހަށް ހުކުރު މިސްކިތުގައި އައު ސައުންޑް ސިސްޓަމެއް ޤާއިމް ކުރެވޭނެކަމަށް ކުޅުދުއްފުށީ ކައުންސިލްގެ ރައީސް އިބްރާހިމް ރަމީޒް ވިދާޅުވެއްޖެ އެވެ.

ކުޅުދުއްފުށި އޮންލައިނުން ކުރި ސުވާލަކަށް ޖަވާބު ދެއްވަމުން  ރަމީޒް ވިދާޅުވީ ކުރިންވެސް ދެ ފަހަރެއްގެ މަތިން ސައުންޑް ސިސްޓަމަށް ދިމާވާ މައްސަލަ ބަލާފައިވާ ކަމަށާއި، އަދި ކަމުގެ ތަޖުރިބާކާރެއްގެ އިރުޝާދުވެސް ހޯދާފައިވާ ކަމަށެވެ.

ސައުންޑް ސިސްޓަމުގެ އަޑު ކެނޑެނީ ބައެއް ފަހަރު ކަމަށްވާތީ ސީދާ މައްސަލަ ދެނެގަންނަން ދަތި ކަމަށާއި މިގޮތުން މިކަމަށް ދާއިމީ ހައްލެއް ލިބެން އަންނަނީ އައު ސިސްޓަމެއް ލައިގެން ކަމަށް ރަމީޒް ވިދާޅުވި އެވެ.

ކުޅުދުއްފުށީ ހުކުރު މިސްކިތުގެ ސައުންޑް ސިސްޓަމަށް މައްސަލަ ދިމާވެފައިވާތާ ވަރަށް ގިނަ ދުވަސްތަކެއް ވަނީ ވެފައެވެ. މިގޮތުން ދޭތެރެ ދޭތެރެއިން އަޑު ކެނޑޭކަން ފާހަގަ ކުރެވެއެވެ. އަދި މަތީބުރީގައި ނަމާދުކުރާ އިރު އެއްވެސް ވަރަކަށް އަޑު ނީވޭ ކަމަށާއި ޚުތުބާ އަޑު އިވުމުގައި އުނދަގޫތަކެއް ހުރި ކަމަށް ބައެއް ފަރާތްތަކުން ބުނެއެވެ.