އެޑިއުކޭޝަން މިނިސްޓްރީއަށް ހާޒިރު ކުރީ ޑިސިޕްލިނަރީ މައްސަލައެއް ބެލުމަށް: ޒިޔާދު ރަޝާދު

އެޑިއުކޭޝަން މިނިސްޓްރީއަށް ހާޒިރު ކުރެވުނީ ޑިސިޕްލިނަރީ މައްސަލައެއް ބެލުމަށް ކަމަށް ހދ އަތޮޅު ތައުލީމީ މަރުކަޒުގެ ޕްރިންސިޕަލް ޒިޔާދު ރަޝާދު ވިދާޅުވެއްޖެ އެވެ.

މިނޫހުން ކުރި ސުވާލަކަށް ޖަވާބުދެއްވަމުން ޒިޔާދު ވިދާޅުވީ އިއްޔެ އެބޭފުޅާ އެޑިއުކޭޝަނަށް ހާޒިރުވެފައިވާ ކަމަށާއި އަދި އެއީ ޑިސިޕްލިނަރީ މައްސަލައެއް ބެލުމަށްކަން އެނގިފައިވާ ކަމަށެވެ. އެހެން ނަމަވެސް އެއީ ކޮން މައްސަލައެއް ކަން ޒިޔާދު ހާމައެއް ނުކުރައްވައެވެ. އަދި އެއީ ކޮން  ފަރާތަކުން އުފުލި މައްސަލައެއްކަން އެނގިވަޑައިގެންފައި ނުވާކަމަށް ޒިޔާދު ވިދާޅުވިއެވެ.

ޒިޔާދު ވިދާޅުވީ ކޮންމެ މަޤާމެއްގެ ހުރި ކޮންމެ މީހަކު ނަމަވެސް މިފަދަ މައްސަލައެއް ހުށަހެޅިއްޖެނަމަ ބަލަން ޖެހޭނެކަން ޤަބޫލު ކުރައްވާ ކަމަށާއި މިއަދުވެސް މިނިސްޓްރީއަށް ހާޒިރުވާން އަންގާފައިވާ ކަމަށެވެ.

އެޑިއުކޭޝަނަށް ހާޒިރުވުމަށް ޒިޔާދަށް އަންގާފައި މިވަނީ، އެޑިއުކޭޝަން މިނިސްޓަރާއި އެމިނިސްޓްރީގެ އިސްވަފުދެއް މިމަހު 18 ވަނަ ދުވަހު ކުޅުދުއްފުއްޓަށް ވަޑައިގެން، ސްކޫލުތަކުގެ އިސްވެރިންނާއި ބައްދަލު ކުރުމުން ސްކޫލު ތަކުން ގިނަ ޝަކުވާތަކެއް ކޮށްފައިވާ ދަނޑިވަޅެއްގަ އެވެ.