ވިލާ ކޮލެޖަށް އޭސީސީއޭގެ ގޯލްޑް އެޕްރޫވަލް ލިބިއްޖެ

ދުނިޔޭގެ ގިނަ ތައުލީމީ އިންސްޓިޓިއުޓްތަކެއްގެ ތެރެއިން އެންމެ ރަނގަޅު އެއް ކޮލެޖްގެ ގޮތުގައި ވިލާ ކޮލެޖް ހޮވައި އޭސީސީއޭގެ ގޯލްޑް އެޕްރޫވަލް އެކޮލެޖަށް ދިފިއެވެ.

އެސޯސިއޭޝަން އޮފް ޗާޓަޑް ސެޓިފައިޑް އެކައުންޓެންޓްސް (އޭސީސީއޭ) އިން އެ އެޕްރޫވަލް ދެނީ އެ ކޮލެޖެއްގައި ހިންގާ އޭސީސީއޭގެ ކޯސްތަކުގެ ފެންވަރު ދިރާސާކޮށް ދަރިވަރުންނާ ސުވާލުކޮށްގެންނެވެ. ގޯލްޑް އެޕްރޫވަލް ލިބުމުން އޭސީސީއޭގެ ރެކަމޮންޑެޑް ޓިއުޝަން ސެންޓަރަށް އެ ކޮލެޖް ވެގެންދާނެއެވެ.

އޭސީސީއޭގެ ކޯސްތައް ދުނިޔޭގެ އެތައް ގައުމެއްގައި ކުރިއަށް ގެންދާއިރު އެތަނުގެ ގޯލްޑް އެޕްރޫވަލް ލިބެނީ މަދު އިންސްޓިޓިއުޓަކަށެވެ. އެހެން ކަމުން ދުނިޔޭގެ އެންމެ ބޮޑު ޗާޓަޑް އެކައުންޓެންޓް ކޮލިފިކޭޝަން ބޮޑީއަކުން، އެތަނުގެ ކޯސްތައް ގަބޫލުކޮށް އެފަދަ ޝަރަފެއް ދިނުމަކީ ކޮލެޖަށް ލިބުނު ވަރަށް ބޮޑު ކުރިއެރުމެއް ކަމަށް އެކޮލެޖުން ހާމަކުރެއެވެ.

ރާއްޖޭގެ ހުރިހާ ކޮލެޖެއްގައި ވެސް އޭސީސީއޭގެ ކޯސްތައް ކުރިއަށް ގެންދެއެެވެ. އެހެންނަމަވެސް، ވިލާ ކޮލެޖަކީ މި  ޝަރަފު ލިބުނު ރާއްޖޭގެ  ފުރަތަމަ ކޮލެޖެވެ.