އިހަވަންދޫ މަދަރުސާގެ ޕީޓީއޭ އިން މަަސައްކަތު ދުވަހެއް ފާހަގަކޮށް ބައިލައްކައެއްހާ ރުފިޔާ ހޯދައިފި

އިހަވަންދޫ މަދަރުސާގެ ޕީޓީއޭ އިން މަަސައްކަތު ދުވަހެއް ފާހަގަ ކޮށް ބައިލައްކަ ރުފިޔާ ހޯދައިފި އެވެ.

އިހަވަންދޫ މަދަރުސާގެ ހިސާބުތަކުން ދައްކާ ގޮތުން މަސައްކަތު ދުވަސް ފާހަގަ ކޮށްގެން ލިބިފައިވަނީ 44924.35 ރުފިޔާ އާއި 7 ޑޮލަރު އެވެ.

އިހަވަންދޫ މަދަރުސާގެ ޕްރިންސިޕަލް މިނޫހަށް މައުލޫމާތު ދެއްވަމުން ވިދާޅުވީ ޕީޓީއޭގެ ފަންޑަށް ފައިސާ ހޯދުމުގެ ގޮތުން ހިންގުނު މި ހަރަކާތުގައި އެ ސްކޫލުގެ ހުރިހާ ބެލެނިވެރިންގެ ފަރާތުން ވަރަށް ބޮޑު އެއްބާރުލުމެއް ދީފައިވާ ކަމަށެވެ. އަދި މި ފައިސާ ޚަރަދުކުރުމަށް ހަމަޖެހިފައިވަަަނީ ސްކޫލުގެ އައިޓީ ދާއިރާ ހަރުދަނާ ކުރުމަށާއި ސްކޫލަށް ބޭނުންވާ ތަފާތު އެކި ކަންކަމަށް ހަރަދުކުރުމަށް ކަމަށް ޕާކިސްތާނަށް ނިސްބަތްވާ ޕްރިންސިޕަލް ކާޝިފް ރަޒާ ޒައިދީ ވިދާޅުވި އެވެ.

10 ގުރޫޕަށް ބަހާލައިގެން އިއްޔެ ހެނދުނު 9 އިން ހަވީރު 4 ގެ ނިޔަލަށް ކުރިއަށް ގެންދިޔަ މި ހަރަކާތުގައި ބެލެނިވެރިން ގޭބީސީ ތަކަށް ޒިޔާރަތްކޮށް އެގެތަކުން ހަވާލުކުރި މަސައްކަތްތައް ވަނީ ފުރިހަމަ ކޮށްފައެވެ.

އިހަވަންދޫ މަދަރުސާ އަކީ ގްރޭޑް 1 އިން 12 އަށް ކިޔަވައިދޭ ސްކޫލެކެވެ. މި މަދަރުސާގައި 700 އަށް ވުރެ ގިނަ ދަރިވަރުން ދަނީ ތައުލީމް ހާސިލް ކުރަމުންނެވެ.