އެޓޯލް އިންޓަރ ސްކޫލް އެތްލެޓިކްސް މީޓަށް ޓާސްކު ފޯހެއް އެކުލަވާލައި، ތައްޔާރީގެ މަސައްކަތްތައް ފަށައިފި

އެޓޯލް އިންޓަރ ސްކޫލް އެތްލެޓިކްސް މީޓަށް ޓާސްކު ފޯހެއް އެކުލަވާލައި، މުބާރާތަށް ތައްޔާރުވުމުގެ މަސައްކަތްތައް ވަރަށް ފޯރިއާއެކު ކުރިއަށް އެބަގެންދެ އެވެ.

މިއަހަރުގެ ސްކޫލުތަކުގެ ސެމިސްޓަރ ބްރޭކުގައި ކުޅުދުއްފުށީގައި ބޭއްވުމަށް ހަމަޖެހިފައިވާ މި އެތުލެޓިސް މީޓަށް ވަމުން ގެންދާ ތައްޔާރީތަކާ ގުޅޭ ގޮތުން ކުޅުދުއްފުށީ ކައުންސިލުގެ ރައީސް އިބްރާހިމް ރަމީޒް ވިދާޅުވީ މި ހަރަކާތް ވީހާވެސް ފުރިހަމަކޮށް ގެންދިޔުމަކީ އެފަރާތުގެ މަގުސަދު ކަމަށާއި މިގޮތުން ޓާސްކު ފޯސް އެކުލަވާލުމުގެ ބޭނުމަކީވެސް ކުލަގަދަ އީދެއްގެ ގޮތުގައި މިކަން ކޮށް ނިންމާލުން ކަމަށެވެ.

ކުޅުދުއްފުށީ ކައުންސިލުން އެކުލަވާލި މި ޓާސްކު ފޯސްގައި ސްކޫލުތަކާއި ކުލަބު ޖަމިއްޔާތަކާއި، ޕޮލިސް އަދި އެމްއެންޑީއެފްގެ އިތުރުން މީޑިޔާ ޕާޓްނަރެއްގެ ގޮތުން ކުޅުދުއްފުށީ އޮންލައިނާއި ކޭލައިވް ހިމެނެއެވެ.

މި ޓާސްކު ފޯސްއިން މިހާރުވެސް ރަށުތެރެ ޒީނަތްތެރި ކުރުމަށްޓަކައި ތަފާތު ވައްތަރުގެ ބެނާ ދަނީ ތައްޔާރު ކުރަމުންނެވެ. އަދި މީގެ އިތުރުން ޘަޤާފީ ކުޅިވަރުތަކާއި ބޮޑުބެރު އަދި އެމްއެންޑީއެފް އާއި ގުޅިގެން ލޭޒާ ޝޯވ އެއް ކުރިއަށްގެންދިޔުމުގެ ވާހަކަތައްވެސް ދެކެވެމުންދާ ކަމަށް ކައުންސިލުން މައުލޫމާތު ދެއެވެ.

އަންނަ ޖޫން މަހުގެ 9 އިން 13 އަށް ކުޅުދުއްފުށީ ޒޯން ސްޓޭޑިއަމްގައި ކުރިއަށްދާ މި އެތްލެޓިކްސް މީޓަކީ ފުރިހަމަ އަދި ކާމިޔާބު މީޓަކަށް ހެދުމަށް ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ބޭނުންވާ ކަމަށް ކައުންސިލުން ބުންޏެވެ. މީގެ ކުރިންވެސް ކުޅުދުއްފުށީގައި މި މުބާރާތްވަނީ ބާއްވާފައި އެވެ.