ފެބްރުއަރީ 8 ގައި ކުޅުދުއްފުށީ ޕޮލިސް ސްޓޭޝަނަށް ގެއްލުންދިން މައްސަލައިގެ އިތުރު އަޑުއެހުމެއް ބާއްވައިފި

މިދިޔަ އަހަރުގެ ފެބްރުއަރީ މަހުގެ 8 ވަނަ ދުވަހު ކުޅުދުއްފުށީ ޕޮލިސް ސްޓޭޝަނަށް ގެއްލުންދިން މައްސަލައިގެ ޝަރީއަތުގެ އަޑުއެހުމެއް މިއަދު ބާއްވައިފި އެވެ.

ފެބްރުއަރީ 7 ވަނަ ދުވަހު ވެރިކަން ބަދަލުވުމާ ގުޅިގެން ރާއްޖޭގެ އެކި ކަންކޮޅުތަކުގައި ހިންގި ހަމަނުޖެހުންތަކުގައި އެދުވަހު ފުލުހުންގެ ދައުރު އަދާކުރުމަށް ދަތިކުރި ކަމުގެ ތުހުމަތުގައި ދައުވާކުރާ މީހުންގެ ތެރެއިން މިއަދު ބާއްވަން އޮތީ 10 މީހެއްގެ ޝަރީއަތުގެ އަޑު އެހުމެވެ. އެހެންނަމަވެސް މިއަދު ބޭއްވިފައިވަނީ 3 މީހެއްގެ ބައެވެ. މިގޮތުން މިއަދު އޮތީ ދައުލަތުގެ ފަރާތުން ހެކިން ހުށަހެޅުމެވެ.

މިއަދުގެ އަޑު އެހުމުގައި ކުރިއަށްގެންގޮސްފައިވަނީ ދައުލަތުން ދައުވާ އުފުލާފައިވާ، ހދ އަތޮޅު ކައުންސިލް މެމްބަރު، ކުޅުދުއްފުށީ ފަރެސް، މުހައްމަދު ޝުކޫރާއި ކުޅުދުއްފުށީ ކައުންސިލުގެ ނައިބު ރައީސް ކުޅުދުއްފުށީ މާދޫގޭ، ފާރޫގު މުހައްމަދާއި ކުޅުދުއްފުށީ ބަހާއު، ޖައިލަމް ހަސަނުގެ މައްޗަށް ދައުލަތުގެ ފަރާތުން ހުށަހަޅާ ހެކިންނާ ސުވާލު ކުރުމެވެ. އެހެން ނަމަވެސް ހުރިހާ ހެކިން ހާޒިރު ނުވުމުގެ ސަބަބުން ޝުކޫރާއި ފާރޫގުގެ ބައި ނިމޭގޮތް ވަނީ ނުވެފައެވެ.

މިއަދު ހެނދުނު 9:30 އިން ފެށިގެން 3 ޖެހުމާ ހަމައަށް ކުޅުދުއްފުށީ މެޖިސްޓްރޭޓް ކޯޓުގައި ވަކިވަކިން ކުރިއަށްގެންދިޔަ މި އަޑުއެހުމަށް މިއަދަށް މައްސަލަ އެޖެންޑާކޮށްފައިވާ ދައުވާ ލިބޭ އެހެން ފަރާތް ތައްވެސް ވަނީ ހާޒިރުވެފައެވެ. އެހެން ނަމަވެސް އެފަރާތްތަކުގެ ދިފާއީ ވަކީލު ފަރީދު މުހައްމަދު މާލެ ވަޑައިގަންނަވަން ޖެހުމުގެ ސަބަބުން މިއަދުގެ ޝަރީއަތުގެ މަޖިލިސް ވަނީ ނިންމަވާލައްވާފައެވެ. އެހެން ނޫންނަމަ މިރެއާއި އެއްކޮށް ހުރިހާ ބައިވެރިންގެ ބައިތައް ނިންމަވާނެކަމަށް ގާޒީ ވިދާޅުވިއެވެ.

މިއަދުގެ ޝަރީއަތުގެ މަޖިލީހުގައި ދިފާއީ ވަކީލަށް މައްސަލައާއި ހަވާލުވެވުނީ ވަރަށް ލަސްވި ފަހުން ކަމަށާއި އެހެން ކަމުން  މައްސަލަ ދިރާސާ ކުރުމަށް އެކަށީގެންވާ ވަގުތު ނުލިބޭކަމަށް ވިދާޅުވުމުން ގާޒީ ވަނީ 5 ދުވަސް ކުރިން ލިޔެކިޔުންތައް ހަވާލުކުރާ ކަމަށްވިދާޅުވެފަ އެވެ. އަދި މިކަމާއި ގުޅިގެން ދައުލަތުގެ ވަކީލު އަހުމަދު ސިރާޖު ވަނީ މިމައްސަލަ ނުނިމި ދިގުލައިގެން ދާތީ އެކަމާއި ކަންބޮޑުވުން ފާޅުކޮށްފައެވެ.

މީގެ ކުރިން، ދައުވާ ލިބޭ ފަރާތްތަކުގެ ވަކީލެއްގެ ގޮތުން މަސައްކަތްކުރެއްވީ ލޯޔަރ އަބްދުﷲ ހަސީނެވެ. އެހެންނަމަވެސް، ސްޕްރީމް ކޯޓުން، ހަސީނު ސަސްޕެންޑު ކުރުމާ ގުޅިގެން މިއަދުގެ ޝަރީއަތަށް ހާޟިރުވީ ލޯޔަރ ފަރީދު އެވެ.

މިދިޔަ އަހަރުގެ ފެބްރުއަރީ 8 ގައި އެމްޑީޕީގެ ސަޕޯޓަރުން ނުކުމެ ކުޅުދުއްފުށީ ޕޮލިސް ސްޓޭޝަންގެ ގޭޓު ހަލާކު ކޮށްލާފައި ވެއެވެ. އަދި ގާއުކުމުގެ ސަބަބުން އެ އިމާރާތަށް އެކިވަރުގެ ގެއްލުން ލިބިފައިވާއިރު، ބައެއް ފުލުހުންނަށް އަނިޔާވެފައިވެ އެވެ.