“ރައިޒް ކުޅުދުއްފުށި” ޕްރޮގްރާމް ނިންމާ ބައިވެރިންނަށް ސެޓްފިކެޓް ދީފި

“ރައިޒް ކުޅުދުއްފުށި” ޕްރޮގްރާމް ނިންމާ ބައިވެރިންނަށް ސެޓްފިކެޓް ދީފި އެވެ.

ހިލޭ ސާބަހަށް މަސައްކަތް ކުރާ ޖަމިއްޔާއެއް ކަމުގައިވާ ޖާރނީ އިން މިމަހު 5 އިން 16 ގެ ނިޔަލަށް ކުރިއަށް ދިޔަ ރައިޒް ކުޅުދުއްފުށި ޕްރޮގްރާމް ނިންމާ ބައިވެރިންނަށް ސެޓްފިކެޓް ދިނުމަށް ރޭ އަފީފުންދީން ސްކޫލު ހޯލުގައި ބޭއްވި ރަސްމިއްޔާތު ޝަރަފްވެރިކޮށްދެއްވީ ޖަލާލުއްދީން ސްކޫލުގެ ޑެޕިއުޓީ ޕްރިންސިޕަލް އަލީ އިސްމާއީލެވެ.

މިރަސްމިއްޔާތުގައި އަލީ އިސްމާއިލް ދެއްކެވި ވާހަކައިގައި މިއީ ނިންމުމުގެ ރަސްމިއްޔާތަށް ހެދުމުގެ ބަދަލުގައި ޕްރޮގްރާމުން ލިބުނު މައުލޫމާތުގެ އަލީގައި މަސައްކަތް ކުރުމަށް ބައިވެރިންނަށް ގޮވާލެއްވި އެވެ. އަދި މުޖްތަމައުގައި އިތުރުވަމުން އާއްމުވަމުންދާ ކުށްތަކުން ރައްކާތެރިވާނެގޮތް މިހާރު ބައިވެރިންނަށް އެނގިފައިވާނޭ ކަމަށާއި އެއަށް އަމަލުކޮށް އެފަދަ ކަންކަން ހުއްޓުވުމަށްވެސް ގޮވާލެއްވި އެވެ.

މި ޕްރޮގްރާމުގައި ބައިވެރިވި  31 ބެލެނިވެރިންގެ ތެރެއިން ޕްރޮގްރާމް ފުރިހަމަ ކޮށް ސެޓްފިކެޓް ހާސިލްކޮށްފައިވަނީ 29 ބެލެނިވެރިންނެވެ. އެހެންނަމަވެސް ޒުވާނުންގެ ތަމްރީން ޕްރޮގްރާމްގައި ބައިވެރިވި 21 ބައިވެރިންވެސް ރޭގެ ޖަލްސާގައިވަނީ ސެޓްފިކެޓް ހާސިލް ކޮށްފައެވެ.

ރައިޒް ޕްރޮގްރާމް ނިންމާ ކުޅުދުއްފުށީގައި މަސައްކަތް ކުރާނެ އެލަޔަންސެއްވެސް އެކުލަވާލާފައިވެއެވެ. މި އެލަޔަންސްގައި ބެލެނިވެރިންގެ ވޯކުޝޮޕުން ހޮވާލެވުނު 5 ބައިވެރިންނާއި ޒުވާނުންގެ ވޯކްޝޮޕުން ހޮވާލެވުނު 5 ބައިވެރިންނާއި ރަށުގެ ކަމުވޮށިގެންވާ 5 ބޭފުޅުން ހިމެނޭކަމަށް ޖާރނީން މައުލޫމާތު ދެއްވައެވެ.

މީގެ އިތުރުން ރޭގެ ރަސްމިއްޔާތުގައި ޖާރނީގެ ފަރާތުން މާލޭގައި ބާއްވާ “މަލްޓި ކޮމްޕޮނެންޓް ކޮމްޕްރެހެންސިވް ކޮމިއުނިޓީ ބޭސްޑް ޕްރިވެންޝަން އޮފް ޑްރަގް އެބިއުސް އެންޑް އެޗްއައިވީ ޕްރޮގްރާމް”ގެ  ތަމްރީނަށް ގެންދިޔުމަށް ކުޅުދުއްފުށީގައި ބޭއްވުނު ވޯކްޝޮޕުން އެންމެ ފާހަގަ ކޮށްލެވުނު 5 ކުއްޖަކު ވަނީ ހޮވާފައެވެ. އޭގެ ތެރޭގައި ހިމެނެނީ އަފީފާ އާދަމް ތުޅާގިރި އާއި، މުހައްމަދު އިބްރާހިމް ރިވެލި އާއި، ފާތިމަތު ރަމީޒާ ސުތުލިމާގެ، އިތުރުން އާދަމް އަލީ ލިޑޯ އާއި އައިޝަތު ޖައުޝަން އިމާދު ނޫރު އެވެ.

ރޭގެ މި ރަސްމިއްޔާތުގައި މުޅި ރައިޒް ޕްރޮގްރާމް ހިނގާ ދިޔަގޮތުގެ ޕްރެޒެންޓޭޝަން ހުށައަޅައިދިނީ ޕްރޮގްރާމް ކޯޑިނޭޓަރ  މުހައްމަދު ރާޝިދެވެ. އަދި އެލަޔަންސްގެ ކޯޑިނޭޓަރ ހދ ކުޅުދުއްފުށީ ތަރަހަ އަލީ އާދަމްވެސް ވަނީ ވާހަކަ ދައްކާފައެވެ. ރޭގެ ޖަލްސާގައި ޝުކުރު ދެންނެވުމުގެ ގޮތުން ވާހަކަ ދެއްކީ އަންހެނުންގެ ކޮމިޓީގެ ރައީސާ އުއްމުކުލްސޫމް އިބްރާހީމެވެ.

މިދިޔަ ހޮނިހިރު ދުވަހު ޖާރނީ އިން ވަނީ ޒުވާނުންނަށް އަމާޒުކޮށްގެން ޔޫތު ކޭމްޕެއް ވެސް ބާއްވާފައެވެ.

ޖާރނީ އަކީ މަސްތުވާ ތަކެއްޗާއި، އެއިޑްސް އަދި ޖިންސީ ގުޅުމުން އަރާބަލިތަކާއިމެދު މުޖްތަމައު ހޭލުންތެރި ކުރުމަށް މަސައްކަތް ކުރާ ޖަމްއިއްޔާއެކެވެ.