ފުލުހުން ޒުވާނުންނަށް ބޭއްވި ޔޫތު ކޭމްޕްގެ ފުރަތަމަ ބުރު ނިންމާ ބައިވެރިންނަށް ސެޓްފިކެޓް ދީފި

ކުޅުދުއްފުށި ޕޮލިސް ސްޓޭޝަނުން  ޒުވާނުންނަށް އަމާޒު ކޮށްގެން ބޭއްވި ޔޫތު ކޭމްޕްގެ ބުރަތަމަ ބުރު ނިންމާ ބައިވެރިންނަށް ސެޓްފިކެޓް ދީފި އެވެ.

މިކަމަށްޓަކައި ރޭ ހދ ރިސޯސް ސެންޓަރުގައި އޮތް ރަސްމިއްޔާތު ޝަރަފްވެރިކޮށްދެއްވާ ބައިވެރިންނަށް ސެޓްފިކެޓް ބައްސަވައި ދެއްވީ ކުޅުދުއްފުށީ ކައުންސިލްގެ ރައީސް އިބްރާހިމް ރަމީޒެވެ. މިރަސްމިއްޔާތުގައި ރަމީޒް ދެއްކެވި ވާހަކައިގައި ކުޅިވަރާއި ރާޅާއެޅުމުގެ ތެރޭގައި އުޅުނު ކަމުގައި ވީނަމަވެސް އެކަޑަމިކް ލެވެލް މައްޗަށް ގެންދިޔުމަށް މަސައްކަތް ކުރަންޖެހޭކަމަށާއި މީގެ 5 އަހަރު ކުރިއަށް ބަލާލާއިރު އޯލެވެލް ނުވަތަ އޭލެވެލް ހެދުމުން ފުދޭކަމަށާއި ނަމަވެސް މިހާރު ސްޓޭންޑާރޑް ވަރަށް ބޮޑަށް ބަދަލުވެފައިވާކަަމަށް ވިދާޅުވި އެވެ. އަދި މި ކޭމްޕްގެ ފުރަތަމަ ފޭސް އަށް ބައިވެރިން ދިން އެއްބާރުލުން ދެވަނަ ފޭސްއަށް ދޭނެކަމަށް އުއްމީދު ކުރައްވާކަމަށްވެސް ވިދާޅުވި އެވެ.

ރޭ ނިމުނު ކޭމްޕާއި ބެހޭގޮތުން މިނޫހަށް މައުލޫމާތު ދެއްވަމުން ސަބްއިންސްޕެކްޓަރ އޮފް ޕޮލިސް އިބްރާހިމް މުހައްމަދު ވިދާޅުވީ މި ޕްރޮގްރާމަކީ ޒުވާނުން ހެޔޮގޮތުގައި ހުސްވަގުތު ހޭދަކުރާނެ ރަނގަޅުގޮތެއް ދަސްކޮށްދީ އެކުދިންގެ އުޅުން ރަނގަޅު ގޮތެއްގައި ބައްޓަންކޮށް އެކަމުގައި ޝާމިލްކޮށްދިނުމުގެ ގޮތުން ކުރިއަށްގެންދެވުނު ޕްރޮގްރާމެއް ކަމަށެވެ.

މި ކޭމްޕްގައި ރާޅާ އެޅުމާއި، ކެނޯޖެހުމާއި ޖިމްނާސްޓިކާއި އެތްލެޓިކްސްގެ ހަރަކާތްތަކުގެ އިތުރުން ފިޒިކަލް އެވެއަރނެސް ޕްރޮގްރާމްތަކެއްްވެސް ހިންގުނެވެ. މިކޭމްޕަށް ރަށު ކައުންސިލާއި، ސްކޫލުތަކުގެ އިތުރުން އަންހެނުންގެ ކޮމިޓީއާއި ޝޭޕް އެރޮބިކްސްގެ ފަރާތުން ވަރަށް ބޮޑު އެއްބާރުލުމެއް ލިބިލައްވާފައިވާކަމަށް އިބްރާހިމް ވިދާޅުވި އެވެ.

34 ބައިވެރިންނާއެކު މިމަހުގެ 18 އިން 24 ގެ ނިޔަލަށް ކުރިއަށް ގެންދެވުނު މި ކޭމްޕްގެ އިންސްޓްރަކްޓަކީ މޫސާ ރަޝީދެވެ.