ހަނިމާދޫ އެއާޕޯޓު ބޮޑުކޮށް އުތުރުގައި ޓޫރިޒަމް ފުޅާކުރާނެ ކަމަށް ގާސިމް އިބްރާހިމް ވިދާޅުވެއްޖެ

ހަނިމާދޫ އެއާޕޯޓު ބޮޑުކޮށް އުތުރުގައި ޓޫރިޒަމް ފުޅާކުރާނެ ކަމަށް ޖުމްހޫރީ ޕާޓީގެ ރިޔާސީ ކެނޑިޑޭޓު ގާސިމް އިބްރާހިމް ވިދާޅުވެއްޖެ އެވެ.

ތިލަދުންމައްޗަށް ގާސިމް މިހާރު ކުރައްވަމުންގެންދަވާ ކެންޕެއިން ދަތުރުތަކުގެ ތެެރެއިން ރޭ ހދ ހަނިމާދޫގައި ބޭއްވި ބައްދަލުވުމުގައި ވާހަކަ ދައްކަވަމުން ގާސިމް ވިދާޅުވީ ޖުމްހޫރީ ޕާޓީގެ ވެރިކަމެއްގައި ހަނިމާދޫ އިންޓަނޭޝަނަލް އެއާޕޯޓްގައި ބޮޑެތި ބޯޓުފަހަރު ޖެއްސޭ ވަރަށް އެތަން ތަރައްގީކޮށް، އުތުރުގެ އަތޮޅުތަކުގައި ޓޫރިޒަމް ފުޅާކުރާނެ ކަމަށާއި އިންތިހާބު ކާމިޔާބު ކުރެވިއްޖެނަމަ ހަނިމާދޫގައި މިހާރު އޮންނަ 1200 މީޓަރުގެ އެއާޕޯޓް، ތިން ކިލޯ މީޓަރަށް ބޮޑުކުރުމުގެ މަސައްކަތް އަންނަ އަހަރު ތެރޭގައި ފަށާނެ ކަމަށެވެ.

އެއާޕޯޓުގެ ޖާގަ ބޮޑުކުރުމުގެ މަަސައްކަތް ކުރާނީ ސަރުކާރުގެ ހަރަދުގައި ކަމަށާއި އެއާޕޯޓް ތަރައްގީކުރުމާ އެކު އުތުރުގެ އަތޮޅުތަކުގައި ޓޫރިޒަމް ތަރައްގީކުރުމަށް ބޭރުގެ ފަރާތްތަކުންނާއި ރާއްޖޭގެ ފަރާތްތަކުން ޝައުގުވެރިވެ އިންވެސްޓްކުރާނެކަން ފާހަގަ ކުރައްވަމުން ގާސިމް ވިދާޅުވީ އަމާޒަކީ އުތުރުގައި 6000 އަށްވުރެ ގިނަ ޓޫރިސްޓު އެނދު ތަރައްގީކުރުން ކަމަށެވެ.

ރޭގެ ޖަލްސާގައި ގާސިމް ވަނީ ތަނެއް ދޮރެއް ނުދަންނަ އެއްވެސް ތަޖުރިބާއެއް ނެތް ޚިޔާނާތް ތެރިންނަށް  ވޯޓު ނުދިނުމަށާއި ގާސިމަށް ގައުމުގެ ވެރިކަން ހަވާލުކުރުމަށް ރައްޔިތުންނަށް ގޮވާލައްވާފައެވެ. މި ޖަލްސާގައި ގިނައަދަދެއްގެ ބަޔަކު އެޕާޓީއާއި ސޮއިކުރުމުގެ ކަންތައްތައް ވަނީ ކުރިއަށް ގެންގޮސްފައެވެ.

“ތަރައްޤީ ގައިމު” މި ޝިއާރުގެ ދަށުން ކުރަމުންދާ ކެމްޕޭނުގައި ވަޑައިގަންނަވާ ކޮންމެ ރަށެއްގައި ބޮޑެތި ވައުދުތަކެއް ގާސިމް ވެވަޑައިގަންނަވަމުންދާކަން ފާހަގަކުރެވެއެވެ.