ޕީޕީއެމް ކުޅުދުއްފުށީ ރިޔާސީ ގޮފީގެ ރައީސް އަދާލަތު ޕާޓީއަށް ސޮއިކުރައްވައިފި

ޕީޕީއެމް ކުޅުދުއްފުށީ ރިޔާސީ ގޮފީގެ ރައީސްގެ މަގާމުގައި ހުންނެވި އަހުމަދު އަޒީމް އަދާލަތު ޕާޓީ އަށް ސޮއި ކުރައްވައިފި އެވެ.

ރޭ ކުޅުދުއްފުށީ ދިނަށަ ގޭގައި އެޕާޓީން ބޭއްވި ކުޑަ ރަސްމިއްޔާތެއްގައި އަޒީމް ސޮއި ކުރެއްވީ އަދާލަތު ޕާޓީގެ ރައީސް ޝެއިހް އިމްރާން އަބުދުﷲގެ ހާޒިރު ގައެވެ.

ޕީޕީއެމް އުމަރު ޓީމަށް ކެމްޕެއިން ކުރެއްވި އަޒީމް އަދާލަތަށް ސޮއި ކުރެއްވުމަށްފަހު މިނޫހަށް ދެއްވި ބަސްދީގަތުމެއްގައި ވިދާޅުވީ އަދާލަތު ޕާޓީއަށް ވެންނެވީ މިވަގުތު ރާއްޖޭގައި އޮތް އެންމެ ގާބިލު ޕާޓީ އަކީ އަދާލަތު ޕާޓީކަމަށް ވާތީ ކަމަށެވެ. އަދި އަދާލަތު ޕާޓީގައި ދެމިހުންނަވާނެ ކަމަށް ވެސް އަޒީމް ވިދާޅުވި އެވެ.

ކުޅުދުއްފުށީ މިރޭ އަދާލަތު ބޭއްވި މި ރަސްމިއްޔާތުގައި 25 މީހުން ވަނީ އެޕާޓީއަށް އަލަށް ގުޅިފައެވެ. ރޭގެ ރަސްމިއްޔާތުގައި އެ ޕާޓީގެ ރައީސްގެ އިތުރުން ހައުސިން މިނިސްޓަރ ޑރ. އަހުމަދު މުއިއްޒާއި އާއި އަސަދުﷲ ޝާފީ އާއި އަތޮޅު ކައުންސިލްގެ ވައިކަރަދޫ ދާއިރާ ތަމްސީލު ކުރައްވާ ކައުންސިލަރ އަހުމަދު ޙަލީލު ބައިވެރިވެވަޑައިގަތެވެ.

މި ރަސްމިއްޔާތު ނިންމާލީ އަދާލަތު ޕާޓީގެ ރައީސްގެ އަގުހުރި ދީނީ ދަރުސަކުންނެވެ.