މަލަސް ޝޯވ އަކީ ވަރަށް ކާމިޔާބު ހަރަކާތެއް: އަމީރު އަމީން ސްކޫލް

މަލަސް ޝޯވ އަކީ ވަރަށް ކާމިޔާބު ހަރަކާތެއްކަމަށް އަމީރު އަމީން ސްކޫލުގެ އެޑްމިނިސްޓްރޭޓަރ އާއިޝަތު މުހައްމަދު ވިދާޅުވެއްޖެ އެވެ.

މެއި މަހުގެ 31 އާއި ޖޫން 1 ވަނަ ދުވަހު ކުރިއަށް ދިޔަ މަލަސް ޝޯވގެ ޓިކެޓު ވިއްކައިގެން ޖުމްލަ 14،320 ރުފިޔާ ލިބިފައިވާ ކަމަށް  އާއިޝަތު ވިދާޅުވި އެވެ. ޝޯވ ބަލާލުމަށް 700 އަށްވުރެ ގިނަ މީހުން ވަދެފައިވާކަންވެސް އާއިޝަތު ފާހަގަ ކުރެއްވި އެވެ.

“އަޅުގަނޑުމެންނަށް ޓިކެޓު ވިއްކައިގެން ލިބިފައިވާވަރު މިއީ. ދެން ގެސްޓުންނާއި ފްރީ ޓިކެޓުގަވެސް ބައެއް ފަރާތްތައް ޝޯވ ބެއްލެވި.” އާއިޝަތު ވިދާޅުވި އެވެ.

ތިލަދެކުނު ސިނަމާގައި ކުރިއަށްދިޔަ މަލަސް ޝޯވގައި  ޔޫކޭޖީ ކުދިންގެ ޑާންސާއި، ޑްރާމާއާއި، ފެޝަންޝޯވ އާއި، ލަވަސެޓާއި، ރައިވަރާއި މަދަހަކިޔުންފަދަ ތަފާތު އައިޓަމްތައް ވަނީ ކުރިއަށްގެންގޮސްފަ އެވެ.

މިޝޯވ ކާމިޔާބު ކަމާއެކު ކުރިއަށް ގެންދިޔުމުގައި އެހީތެރިކަންދެއްވި ސްކޫލުގެ ބެލެނިވެރިންނަށާއި މުވައްޒަފުންނަށް އަދި ސިނަމާގެ މުވައްޒަފުންނަށް ޝުކުރު އަދާކުރައްވާކަންވެސް އާއިޝަތު ފާހަގަ ކުރެއްވި އެވެ.

މިދިޔަ އަހަރުގެ މަލަސް ޝޯވގައި 99 ދަރިވަރަކު ބައިވެރިވެފައިވާއިރު މިއަހަރު ބައިވެރިވެފައިވަނީ 105 ދަރިވަރުންނެވެ.