ކުޅުދުއްފުށީ އޮންލައިންގެ ކުރުވާހަކަ ލިޔުމުގެ 3 ވަނަ މުބާރާތް މިމަހު ފަހުކޮޅުގައި ބާއްވަނީ

ކުޅުދުއްފުށީ އޮންލައިން އާއި ޖަލާލުއްދީން ސްކޫލުގެ ދިވެހި ޑިޕާޓްމަންޓް ގުޅިގެން ބާއްވާ ކުރުވާހަކަ ލިޔުމުގެ މިއަހަރުގެ މުބާރާތް މިމަހު 29 ގައި ބާއްވާގޮތަށް ހަމަޖައްސައިފި އެވެ.

ޖަލާލުއްދީން ސްކޫލުގެ ދަރިވަރުންނަށް އަމާޒުކޮށްގެން މީގެ ދެ އަހަރު ކުރިން ފެށިގެން ބާއްވަމުން އަންނަ މި މުބާރާތަކީ ދިވެހި ބަސް ކުރިއަރުވާ، ވާހަކަ ލިޔުމުގެ ފަންނު ދަރިވަރުންގެ ކިބައިގައި އަށަގެންނެވުމުގެ ގޮތުން ބާއްވާ މުބާރާތެއް ކަމަށް ކުޅުދުއްފުށި އޮންލައިންގެ މެނޭޖްމަންޓުން ބުނެއެވެ. އަދި މި މުބާރާތް ގަވާއިދުން ކޮންމެ އަހަރަކުވެސް ބާއްވާނެ ކަމަށް އެފަރާތުން މައުލޫމާތު ދެއެވެ.

ޖަލާލުއްދީން ސްކޫލުގެ ގްރޭޑް 10، 11 އަދި 12 ގެ ދަރިވަރުންނަށް އަމާޒުކޮށްގެން ކުރިއަށް ގެންދާ އެ މުބާރާތުން ހޮވާލެވޭ އެންމެ މޮޅު 15 ވާހަކަ “ކުޅުދުއްފުށި އޮންލައިން” ގައި ޝާއިއު ކުރާނެއެވެ.

ކުޅުދުއްފުށި އޮންލައިނުން މިދިޔަ އަހަރު ބޭއްވި ކުރުވާހަކަ ލިޔުމުގެ މުބާރާތުގެ އެއްވަނަ ހޯދާފައިވަނީ ޝާމިލް އިބްރާހިމް އެވެ. އެއީ ޝާމިލް މިމުބާރާތުގެ އެއްވަނަ ހޯދި ދެވަނަ ފަހަރެވެ. މިދިޔަ އަހަރުގެ މުބާރާތުގެ އެއްވަނަ އަށް ދިޔަ ފަރާތަށް އެންޑްރޮއިޑް ޓެބްލެޓެއްގެ އިތުރުން ޓްރޮފީއަކާއި ހަނދާނީ ލިޔުމެއް ވަނީ ދީފައެވެ.