ހެލްތު ޓްރަސްޓް ފަންޑަށް ފައިސާ ހޯދުމަށް ބޭއްވި ޖަމްބަލް ސޭލުން 20 ހާހެއްހާ ރުފިޔާ ހޯދައިފި

ހެލްތު ޓްރަސްޓް ފަންޑަށް ފައިސާ ހޯދުމަށް ކުޅުދުއްފުށީ ރީޖަނަލް ހޮސްޕިޓަލުން ބޭއްވި ޖަމްބަލް ސޭލުން 20 ހާހެއްހާ ރުފިޔާ ހޯދައިފި އެވެ.

ކުޅުދުއްފުށީ ރީޖަނަލް ހޮސްޕިޓަލުގެ އެކްޓިން ޑެޕިއުޓީ މެނޭޖަރ މުހައްމަދު ހަސަން މިނޫހަށް މައުލޫމާތު ދެއްވަމުން ވިދާޅުވީ ޖަމްބަލް ސޭލުން 19223.75 ރުފިޔާ ލިބިފައިވާ ކަމަށެވެ.

މިދިޔަ ހުކުރު ދުވަހުގެ މެންދުރުފަހު ހދ އަތޮޅު ތައުލީމީ މަރުކަޒުގެ ހޯލުގައި އޮތް މި ޖަމްބަލް ސޭލުގައި އަންނައުނާއި ކާބޯތަކެތީގެ އިތުރުން ދިރޭ ތަކެތިވެސް ވަނީ ވިއްކާފައެވެ.

މި ޖަމްބަލް ސޭލަށް ހޮސްޕިޓަލުގެ މުވައްޒަފުންނާއި ތައުލީމީ މަރުކަޒާއި ދިރާގާއި ސަފާޔާ ފިހާރައިގެ ވަރަށް ބޮޑު އެހީތެރިކަމެއް ލިބިފައިވާ ކަމަށް މުހައްމަދު ހަސަން ވިދާޅުވި އެވެ.

ހެލްތު ޓްރަސްޓް ފަންޑަކީ ސަރުކާރާއި އަމިއްލަ ޖަމިއްޔާތަކާއި އާންމު ފަރުދުންގެ ހިއްސާއާއެކު، ރައްޔިތުންނަށް ސިއްހީ ހިދުމަތް ފޯރުކޮށްދިނުމަށް ބޭނުންވާ ވަސީލަތް ހޯދުމާއި ގާއިމު ކުރުމަށްޓަކައި ހަރަދުކުރާނޭ ފައިސާ ހޯދުމަށް މިނިސްޓްރީ އޮފް ހެލްތުން ކުރިއަށް ގެންދާ ފަންޑެކެވެ. އެފަންޑަށް ފައިސާ ހޯދުމަށް ކުޅުދުއްފުށީ ރީޖަނަލް ހޮސްޕިޓަލްގައި މި މަހުގެ 4 ވަނަ ދުވަހު ވަނީ ފަންޑު ފޮއްޓެއް ބަހައްޓާފައެވެ. އޭގެ އިތުރުން ރޭ ވަނީ ފަންނާނުންގެ ޝޯއެއްވެސް ބާއްވާފައެވެ.