ރައީސް ވަހީދުގެ ކޯލިޝަން ޓީމަށް ކުޅުދުއްފުށިން ފިނި މަރުހަބާއެއް

ރައީސުލްޖުމްހޫރިއްޔާ ޑރ މުހައްމަދު ވަހީދު ހަސަން މަނިކުގެ ކޯލިޝަން ޓީމަށް ކުޅުދުއްފުށިން ފިނި މަރުހަބާއެއް ކިޔައިފި އެވެ.

ކުރިން ހަމަޖެހިފައިވާ ގަޑިއަށްވުރެ 2 ގަޑި އިރެއްހާ ފަހުން މިއަދު މެންދުރު 1 ޖެހި އިރު ވަޑައިގެންނެވި ރައީސް ވަހީދުގެ “ފުޅާ ކޯލިޝަން”ގެ ބޭފުޅުންނަށް ކުޅުދުއްފުށީ އުތުރު ބަނދަރަށް މަރުހަބާ ދެންނެވީ އެމަނިކުފާނުގެ ކޯލިޝަނަށް ތާއީދު ކުރައްވާ ވަރަށް މަދު އަދަދެއްގެ ބައެކެވެ. މިގޮތުން ސަރުކާރުގެ މުއައްސަސާތަކުގެ އިސް ވެރިން ހިމެނޭގޮތަށް ބަނދަރު ސަރަހައްދަށް ޖަމާވެފައިވަނީ ގާތްގަނޑަކަށް 50 އެއްހާ މީހުންނެވެ.

ރައީސް ވަހީދުގެ މި ދަތުރުފުޅުގައި އެމަނިކުފާނުގެ ރަނިންމޭޓު ޑީއާރުޕީގެ ލީޑަރު އަހުމަދު ތަސްމީން އަލީ އާއި ގައުމީ ޕާޓީގެ ލީޑަރ ޑރ. ހަސަން ސައީދާއި އިސްލާމިކް މިނިސްޓަރ ޝެއިހް މުހައްމަދު ޝަހީމުވެސް ބައިވެރިވެވަޑައިގަންނަވައެވެ. އަދި މީގެ އިތުރުން ސަރުކާރުގެ އިސް މަގާމުތަކުގެ ބޭފުޅުންނާއި ކޯލިޝަނަށް ނިސްބަތްވާ ބައެއް އިސް ބޭފުޅުން މި ދަތުރުފުޅުގައި ބައިވެރިވެވަޑައިގަތެވެ.

ކޯލިޝަންގެ ފަރާތުން ކުޅުދުއްފުށީގައި ބާއްވާ ޖަލްސާ މިރޭ އަފީފުއްދީން ސްކޫލުގައި އޮންނާނެއެވެ. އަދި މި ޖަލްސާއަށް މި ސަރަހައްދުގެ ރަށްތަކުން ގިނަ އަދަދެއްގެ ބަޔަކު ގެންނަމުންދާ ކަމަށް ޤައުމީ އިއްތިހާދު ޕާޓީގެ އިސް އޮފިޝަލެއް މިނޫހަށް ވަނީ ކަށަވަރު ކޮށްދީފައެވެ.