ހެލްތު ޓްރަސްޓް ފަންޑަށް ފައިސާ ހޯދުމުގެ ގޮތުން ބޭއްވި ފަންނާނުންގެ ޝޯވ އިން 13 ހާހެއްހާ ރުފިޔާ ހޯދައިފި

ހެލްތު ޓްރަސްޓް ފަންޑަށް ފައިސާ ހޯދުމުގެ ގޮތުން ބޭއްވި ފަންނާނުންގެ ޝޯވ އިން 13 ހާހެއްހާ ރުފިޔާ ހޯދައިފި އެވެ.

މިނޫހަށް މައުލޫމާތު ދެއްވަމުން ކުޅުދުއްފުށީ ރީޖަނަލް ހޮސްޕިޓަލުގެ އޮފިޝަލަކު ވިދާޅުވީ އެ ޝޯވ ބާއްވައިގެން 12490 ރުފިޔާ ލިބިފައިވާ ކަމަށެވެ.

މިދިޔަ ހޮނިހިރު ދުވަހުގެ ހަވީރު ބޭއްވި ކުޑަކުދިންގެ ޝޯއަކާއި އެރޭ ބޮޑެތި މީހުންނަށް ހާއްސަކޮށްގެން ތިލަ ދެކުނު ސިނަމާގައި ހައުސް ފުލް ދެ ޝޯވ ވަނީ ބާއްވާފައި އެވެ. މިޝޯވގައި ބޮޑުބެރުގެ އައިޓަމްތައް ހުށަހަޅާދީފައިވަނީ ދައްސޫރަ ބޮޑުބެރު ގުރޫޕާއި މިސްގާލް ބޮޑުބެރު ގުރޫޕް އަދި ޔަންގް މިސްގާލް ބޮޑުބެރު ގުރޫޕާއި އަންހެނުންގެ ބޮޑުބެރު ގުރޫޕް ހަރުމަލެވެ.

އަދި ޑާންސް ގުރޫޕްތަކުގެ ތެރޭގައި ކަންމަތި، އިނޮސެންސް، ޔަންގްބޯއީސް، ޔަންގް ގާރލްސް އަދި ސަގާފީ ކުޅިވަރު ގުރޫޕެއް ކަމަށްވާ މަލަކާގެ ހަރަކާތްތަކެއް ޝޯގައި ވަނީ ފެނިގެން ގޮސްފައެވެ. އަދި ޑީއެލްޑީ އާއި ދޮނޭގެ ހުށައެޅުންތަކާއި ޝޭޕް އެރޮބިކްސް ކްލާހުގެ ހަރަކާތްތަކެއްވެސް ކުރިއަށް ގެންދިޔައެވެ.

ހޮނިހިރު ދުވަހުގެ ރޭގެ ހަރަކާތްތައް ނިމުމުން ޝޯވގައި ހަރަކާތްތައް ހުށައެޅި ފަރާތްތަކަށް ވަނީ ސެޓްފިކެޓް ހަވާލުކޮށްފައެވެ.

ހެލްތު ޓްރަސްޓް ފަންޑަށް ފައިސާ ހޯދުމަށް ކުޅުދުއްފުށީ ރީޖަނަލް ހޮސްޕިޓަލުން ބޭއްވި ޖަމްބަލް ސޭލުން 20 ހާހެއްހާ ރުފިޔާ ވަނީ ހޯދައިފަ އެވެ.