ވޯޓު ރަޖިސްޓްރީއަށް ޝަކުވާ ހުށަހެޅުމުގެ ސުންގަޑި ހަމަވިއިރު ހުށަހަޅާފައި ވަނީ 37 ޝަކުވާ

ވޯޓުލުމުގެ ހައްގު ލިބިފައިވާ މީހުންގެ ލިސްޓަށް ޝަކުވާ ހުށަހެޅުމުގެ ސުންގަޑި ހަމަވިއިރު ހުށަހަޅާފައި ވަނީ 37 ޝަކުވާ ކަމަށް ކުޅުދުއްފުށީ ކައުންސިލް އިދާރާއިން ހާމަކޮށްފި އެވެ.

މިނޫހަށް މައުލޫމާތު ދެއްވަމުން ކައުންސިލުގެ ސީނިއަރ ޕްރޮޖެކްޓް އޮފިސަރ ޢަލީ އިބްރާހީމް ވިދާޅުވީ ހުށަހެޅިފައިވާ ގިނަ މައްސަލަތަކަކީ އެޑްރެސް ނުބައިކޮށް ހުރުމުގެ ސަބަބުން ހުށަހެޅިފައިވާ ޝަކުވާތަކެއް ކަމަށާއި ލިސްޓުގައި ނަން ނެތުމުގެ ޝަކުވާ ވެސް މަދުން ނަމަވެސް ހުށަހެޅިފައިވާ ކަމަށެވެ.

ވޯޓު ދިނުމުގެ ހައްގު ލިބިފައިވާ މީހުންގެ ލިސްޓަށް ޝަކުވާ ހުށަހެޅުމުގެ ސުންގަޑި މިދިޔަ އާދީއްތަ ދުވަހަށް ހަމަވެފައިވާއިރު އެ މުއްދަތުގެ ފަހުން ހުށަހަޅާ އެއްވެސް ޝަކުވާއެއް ބަލައެއް ނުގަންނާނެ އެވެ. ވޯޓު ލުމުގެ ހައްގުލިބިފައިވާ މީހުންގެ ލިސްޓާ ގުޅިގެން ހުށަހަޅާފައިވާ ޝަކުވާތައް ބެލުމަށްފަހު އަލުން ގެޒެޓް ކުރައްވާނެ ކަމަށް އިލެކްޝަން ކޮމިޝަނުން ވަނީ ބުނެފަ އެވެ.

ސެޕްޓެމްބަރު 7 ވަނަ ދުވަހު އޮންނަ ރިޔާސީ އިންތިޚާބުގައި ވޯޓުލިބުމުގެ ހައްގު ލިބިފައިވަނީ ކުޅުދުއްފުށީގެ 6016 މީހުންނަށެވެ.