ކުޅުދުއްފުށީގައި ދަންޖެހިފައި ހުރި މީހަކު ސަލާމަތް ކޮށްފި

ކުޅުދުއްފުށީގައި މިއަދު ހަވީރު ދަންޖެހިފައިހުރި މީހަކު ސަލާމަތް ކޮށްފި އެވެ.

މިއަދު ދަންޖެހިގެން މަރުވާން އުޅުނީ ކުޅުދުއްފުށީ ބްލޫގްރާސް އަލީ މުހައްމަދު (39 އަހަރު) އެވެ. ކުޅުދުއްފުށި އޮންލައިނަށް މައުލޫމާތު ހިއްސާކުރި މީހަކު ކިޔައިދިން ގޮތުގައި އެމީހާ ދަންޖެހިފައި ހުރީ އޭނާގެ ކޮޓަރީގެ ފަންކާގައި ވާގަނޑެއް އައްސައިގެންނެވެ. އޭނާ ސަލާމަތްކޮށްފައިވަނީ އޭނާގެ އަންހެނުންނާއި އެގޭ އަވަށްޓެރިން ވެގެންނެވެ.

“އޭނާ ދަންޖެހިފައިހުރީ ކޮޓަރި ފަންކާގައި. އޭނަގެ އަންހެނުންނަށް ފެނިގެން ގޮސް ހިފެހެއްޓީ. ހިފަހައްޓާފަ ދަރިފުޅުކައިރީ ބުނެގެން ގޭދޮށު މީހުންނަށް ގޮވައިގެން އެތަނަށް އައި ދެ މީހަކުވެގެން ސަލާމަތް ކުރީ.” އޭނާ ބުންޏެވެ.

މި ނޫހަށް އެނގިފައިވާ ގޮތުގައި މި މީހާ މިހާރު ހުރީ ކުޅުދުއްފުށީ ޕޮލިސް ސްޓޭޝަނުގެ ފުލުހުންގެ ބެލުމުގެ ދަށުގައި އެވެ. އޭނާ ދަންޖެހުނު ސަބަބެއް އަދި ވަނީ އެނގޭގޮތް ނުވެފައި އެވެ. ފުލުހުންގެ ބެލުމުގެ ދަށުން އޭނާ ހޮސްޕިޓަލަށް ގެންދިޔަކަމަށް މައުލޫމާތު ލިބެއެވެ.

މިކަމާ ގުޅޭ ގޮތުން ފުލުހުންގެ ބަހެއް ވަނީ ލިބޭގޮތް ނުވެފައި އެވެ.