އިއްޔެ ދަންޖެހުނު މީހާ ފަރުވާ ދިނުމަށްފަހު ދޫކޮށްލައިފި

ކުޅުދުއްފުށީގައި އިއްޔެ ހަވީރު ދަންޖެހުނު ކުޅުދުއްފުށީ ބްލޫގްރާސް އަލީ މުހައްމަދު، 38، ފަރުވާދިނުމަށްފަހު ދޫކޮށްލައިފި އެވެ.

ކުޅުދުއްފުށީ ރީޖަނަލް ހޮސްޕިޓަލުގައި ފަރުވާ ދިނުމަށްޓަކައި އަލީ މުހައްމަދު ގެންދެވި ފަރުވާއަށްފަހު ދޫކޮށްލާފައިވަނީ ރޭގެ ވަގުތެއްގައެވެ.

ފުލުހުންގެ މީޑިޔާ އޮފިޝަލް ސަބް އިންސްޕެކްޓަރ އޮފް ޕޮލިސް ހަސަން ހަނީފް މިނޫހަށް މައުލޫމާތު ދެއްވަމުން ވިދާޅުވީ ދަންޖެހިގެން މީހަކު އުޅޭ ކަމުގެ ރިޕޯޓު ލިބިގެން ފުލުހުން އެގެއަށް ދިޔައިރު އަވަށްޓެރިންގެ އެހީތެރިކަމާއެކު އޭނާ ސަލާމަތްކޮށްފައިވާ ކަމަށެވެ.  އޭނާ ދަންޖެހުމަށް ބޭނުންކުރި ނައިލޯނު ވާ ކޮޓައިތެރެއިން ފެނިފާ ވާކަމަށާއި ފުލުހުންގެ އެހީތެރިކަމާއެކު ރޭ  ކުޅުދުއްފުށީ ހޮސްޕިޓަލަށް ގެންދެވި ފަރުވާދެވިފައިވާކަމަށްވެސް ހަނީފް ވިދާޅުވި އެވެ.

ހަނީފް ވިދާޅުވީ އޭނާ ގެންދެވިފައިވަނީ ކުށްވެރިއެއްގެ ހައިސިއްޔަތުން ނޫން ކަމަށާއި އޭނާގެ ހާލު ސީރިޔަސް ނޫން ކަމަށެވެ.

މިނޫހަށް މައުލޫމާތު ލިބިފައިވާ ގޮތުގައި އަލީ މުހައްމަދު ދަންޖެހެން މަސައްކަތްކޮށްފައިވަނީ އަންހެނުންނާ ޖެހުނު މައްސަލައެއްގައެވެ.