ވައިކަރަދޫ ކައުންސިލްގެ ނައިބު ރައީސް ޖޭޕީއަށް ސޮއި ކުރެއްވިތާ މަހެއް ނުވަނީސް އަލުން އެމްޑީޕީއާ ގުޅިއްޖެ

ވައިކަރަދޫ ކައުންސިލްގެ ނައިބު ރައީސް އަބްދުﷲ ޝަރީފް ޖުމްހޫރީ ޕާޓީއަށް ސޮއި ކުރެއްވިތާ މަހެއް ނުވަނީސް އަލުން އެމްޑީޕީއާ ގުޅިއްޖެ އެވެ.

މިކަމާ ގުޅިގެން އަބްދުﷲ ޝަރީފަށް މިނޫހުން ގުޅާލުމުން ފޯނު ނުނަންގަވާތީ އެބޭފުޅާގެ ބަހެއް ވަނީ ލިބޭގޮތް ނުވެފައެވެ. އެހެން ނަމަވެސް ވައިކަރަދޫ ކައުންސިލްގެ މެމްބަރެއް  ވަނީ މީގެ 2 ދުވަސް ކުރިން ނައިބު ރައީސް އަލުން އެމްޑީޕީއަށް ސޮއިކުރިކަން މިނޫހަށް ކަށަވަރު ކޮށްދެއްވާފަ އެވެ.

ވައިކަރަދޫ ކައުންސިލްގެ ނައިބު ރައީސް ޖޭޕީއަށް ސޮއިކޮށްފައިވަނީ އެޕާޓީގެ ލީޑަރު ގާސިމް އިބްރާހިމް އުތުރުގެ ރަށްތަކަށް ކުރެއްވި ދަތުރުފުޅުގައި ހދ ނެއްލައިދޫގައި ބޭއްވި ޖަލްސާގައި މެއި މަހުގެ 24 ވަނަ ދުވަހުގެ ރެއެވެ.

އެރޭ ޖުމުހޫރީ ޕާޓީ އަށް ސޮއި ކުރެއްވުމަށް ފަހު ޖަލްސާ ގައި ވާހަކަ ދައްކަވަމުން އޭނާ ވިދާޅުވީ ޤައުމު ސަލާމަތުގެ އައްސޭރި އަކަށް ގެންދެވޭނެ ހަމައެކަނި ބޭފުޅަކީ ގާސިމް އިބުރާހިމް ކަމަށާއި 10 އަހަރު އެމްޑީޕީ ގައި ހުރެވިއްޖެ ކަމަށެވެ.  އެހެން ނަމަވެސް ޤައުމު ތަރައްގީ ވެފައި ނުވާކަމާއި ގައުމު ތަރައްގީ ވާނީ ޖުމްހޫރީ ޕާޓީން ކަމަށް ވާތީ އެފާޓީ އާ ގުޅުނީ ކަމަށެވެ.

ވައިކަރަދޫ ކައުންސިލްގައި މިހާރު ހިމެނެނީ އެމްޑީޕީގެ 4 މެމްބަރުންނާއި ޖޭޕީގެ މެމްބަރެކެވެ.