ކުޅުދުއްފުށީގައި ހުންނަ އެސްޓީއޯގެ ބޭސް ފިހާރައިން 24 ގަޑިއިރު ހިދުމަތް ދޭން ފަށައިފި

ކުޅުދުއްފުށީގައި ހުންނަ އެސްޓީއޯގެ ބޭސް ފިހާރަ 24 ގަޑިއިރު ހިދުމަތް ދޭ ގޮތަށް ބަދަލުކޮށްފި އެވެ.

އެސްޓީއޯގެ ސޭލްސް އެންޑް މާކެޓިންގެ ޖެނެރަލް މެނޭޖަރ އާދަމް އާޒިމް މިއަދު ވިދާޅުވީ އެކުންފުނިން ކުޅުދުއްފުށީގައި ގާއިމު ކޮށްފައިވާ ބޭސް ފިހާރައަށް ފާމަސިސްޓުން ހޯދުމުގެ ދަތިކަން ހުރި ކަމަށާއި 24 ގަޑިއިރުގެ ހިދުމަތް ދޭން ފެށުނީ އެ ކުންފުނީގެ މުއައްޒަފުން މާލެ ފޮނުވައިގެން ތަމްރީނުކޮށްގެން ކަމަށެވެ.

އާޒިމް ވިދާޅުވީ އެހެން ރަށްރަށުގައި ހުރި އެސްޓީއޯގެ ބޭސްފިހާރަތައް ވެސް 24 ގަޑިއިރު ހިދުމަތް ދޭ ގޮތަށް ބަދަލުކުރެވޭނެ ކަމަށާއި އެހެން ނަމަވެސް އެކަން ކުރެވެން އަންނަނީ މީހުން ތަމްރީނުކުރުމަށް ފަހު ކަމަށެވެ.

ކުޅުުދުއްފުށީ ހޮސްޕިޓަލުގެ ގޯތި ތެރޭގައި ހުންނަ އެސްޓީއޯގެ ބޭސްފިހާރަ ހުޅުވާފައިވަނީ މިދިޔަ އަހަރުގެ މެއި މަހުގެ ތެރޭގައި އެވެ.