ފުލުހުންނާއި ހއ. އެފްސީއެސްސީއާ ގުޅިގެން ހޭލުންތެރިކުރުމުގެ ޕްރޮގްރާމެއް ކެލާގައި ކުރިއަށް ގެންގޮސްފި

ފުލުހުންނާއި ހއ. ފެމިލީ އެންޑް ޗިލްޑްރެން ސަރވިސް ސެންޓަރާ ގުޅިގެން ” މުޖްތަމުޢުގެ ރައްކާތެރިކަން – އެންމެންގެ އެއްބާރުލުން” މި ޝިއާރުގެ ދަށުން ހއ. ކެލާގައި ހޭލުންތެރިކުރުމުގެ ޕްރޮގްރާމެއް ކުރިއަށް ގެންގޮސްފި އެވެ.

ހއ. އިހަވަންދޫ ޕޮލިސް ސްޓޭޝަނާއި ހއ. ދިއްދޫ ޕޮލިސް ސްޓޭޝަނުގެ އިތުރުން ހއ. ފެމިލީ އެންޑް ޗިލްޑްރެން ސަރވިސް ސެންޓަރާ ގުޅިގެން ކުރިއަށް ގެންދާ ސިލްސިލާ މި ޕްރޮގްރާމްގައި ސްކޫލު ކުދިންނަށާއި ބެލެނިވެރިންނަށާއި ޓީޗަރުންނަށް ވަކި ސެޝަންތަކެއް ވަނީ ނަގައިދީފަ އެވެ.

މިގޮތުން ކުރިއަށް ގެންދެވުނު ސެޝަންތަކުގައި ކުޑަކުދިންނަށް ކުރާ ހާނިއްކައާއި ހާނިއްކައިން ރައްކާތެރިވާނެ ގޮތްތަކާއި ކުޑަކުދިންނަށް ޖިންސީ އަނިޔާ ކުރާ ފަރާތްތަކާމެދު ހާއްސަ އުސޫލަކުން އަމަލު ކުރުމުގެ ޤާނޫނާއި އެއްގަމު ދަތުރުފަތުރުގެ ޤާނޫނުގެ އިތުރުން ކުޑަކުދިން ތަރުބިއްޔަތު ކުރުމާއި ގުޅޭގޮތުން މައުލޫމާތު ދީފައިވާ ކަމަށް ފުލުހުންގެ މީޑިޔާއިން މައުލޫމާތު ދެއެވެ.

މި ޖުލައި މަހުގެ 1 އަދި ދެވަނަ ދުވަހު ކުރިއަށް ގެންދެވުނު މި ޕްރޮގްރާމުގައި މައުލޫމާތު ދީފައިވަނީ އިހަވަންދޫ ޕޮލިސް ސްޓޭޝަންގައި މަސައްކަތްކުރާ ފުލުހުންގެ އިތުރުން ހއ.ފެމިލީ އެނޑް ޗިލްޑްރެން ސަރވިސް ސެންޓަރުގެ މުވައްޒަފުންނެވެ.