ކުޑަ އަންހެން ކުއްޖަކާއެކު ބަދުއަހުލާގީ އަމަލު ހިންގި މައްސަލައެއްގައި ކުޅުދުއްފުށީ ދެ މީހަކު ހައްޔަރުކޮށްފި

ހދ ހަނިމާދޫގައި ކުޑަ އަންހެން ކުއްޖަކާއެކު ބަދުއަހުލާގީ އަމަލު ހިންގި ކަމުގެ ތުހުމަތުގައި ކުޅުދުއްފުށީ 2 ޒުވާނަކު ހައްޔަރު ކޮށްފިއެވެ.

ފުލުހުންގެ ތަރުޖަމާނު މިނޫހަށް މައުލޫމާތު ދެއްވަމުން ވިދާޅުވީ ކުޑަ އަންހެން ކުއްޖަކާއެކު ބަދުއަހުލާގީ އަމަލު ހިންގި ކަމުގެ ތުހުމަތުގައި 2 ފިރިހެނުން ހަނިމާދޫ އިން ހައްޔަރު ކޮށްފައިވާ ކަމަށާއި މިމީހުން ހައްޔަރު ކުރެވުނީ މިދިޔަ މަހުގެ 29 ވަނަ ދުވަހު ފުލުހުންނަށް ލިބުނު ރިޕޯޓަކާ ގުޅިގެން ކަމަށެވެ. މިމައްސަލާގައި ހައްޔަރު ކޮށްފައިވަނީ 19 އަހަރުގެ ޒުވާނަކާއި 20 އަހަރުގެ ޒުވާނެއް ކަމަށް ފުލުހުން މައުލޫމާތު ދެއެވެ. އެމީހުންގެ ނަމެއް ފުލުހުން ހާމަކޮށްފައެއް ނުވެއެވެ.

މިނޫހަށް އެނގިފައިވާ ގޮތުގައި މިމައްސަލަގައި ހައްޔަރު ކޮށްފައިވަނީ ހދ ކުޅުދުއްފުށީ، ގިގުނިމާގެ އަހުމަދު އަބުދުﷲ 19އ އާއި ކުޅުދުއްފުށީ ގެދަމަލުގެ އަހުމަދު އަބުދުލް ޣަފޫރު 20އ އެވެ.

މި ދެ މީހުންގެ ބަންދުގެ މުއްދަތަށް ހަނިމާދޫ ކޯޓުން 11 ދުވަސް ވަނީ ޖަހައިދީފައެވެ. މި ދެ މީހުންނަކީ ހަނިމާދޫ އެއާޕޯޓުގައި ހުންނަ ރެސްޓޯރެންޓެއްގައި މަސައްކަތްކުރާ ދެ މީހުންކަން މިނޫހަށް ވަނީ އެނގިފައެވެ.

ފުލުހުން ތަހުގީގު ކުރަމުންދާ މައްސަލައަކަށް ވާތީ އިތުރު މައުލޫމާތު ދެވެންނެއް ކަމަށް އެފަރާތުން ހާމަކުރެއެވެ.