ފެބްރުއަރީ 8 ގައި ފުލުހުން ކުރި “އަނިޔާ” ދައްކުވައިދޭ ފޮޓޯ މައުރަޒެއް ކުޅުދުއްފުށީގައި ހުޅުވައިފި

މިދިޔަ އަހަރުގެ ފެބްރުއަރީ 7 އަދި 8 ގައި ފުލުހުން ކުރި “އަނިޔާ”ތައް ދައްކުވައިދޭ ފޮޓޯ މައުރަޒެއް ކުޅުދުއްފުށީގައި ހުޅުވައިފި އެވެ.

މިރޭ ކުޅުދުއްފުށީގައި ހުޅުވި މި ފޮޓޯ މައުރަޒު ހުޅުވައިދެއްވީ ކުރީގެ މަތިއުތުރު ގައުމީ އިދާރާގެ ސްޓޭޓް ސެކްރެޓަރީ ހަސަން ޒިޔާދެވެ. މި ފޮޓޯ މައުރަޒު އިންތިޒާމުކުރި ހުސެއިން އިފްލާހު (އިއްފަ) ވިދާޅުވީ އެމްޑީޕީގެ ވެރިކަން ބަދަލުވި ދުވަހާއި އަދި ޖެހިގެން އައި ފެބްރުއަރީ 8 ވަނަ ދުވަހަކީ ސަލާމަތީ ބާރުތަކުން މިރާއްޖޭގެ ރައްޔިތުންނަން ލާއިންސާނީ އަނިޔާ ދިން ދުވަސްތަކެއް ކަމަށާއި މިމައުރަޒު ބޭއްވުމުގެ ބޭނުމަކީ އެފަދަ ލާއިންސާނީ އަނިޔާތައް ހުއްޓުވުމަށް މަސައްކަތް ކުރުން ކަމަށެވެ.

އިފްލާހު އިތުރަށް ވިދާޅުވީ މި ފޮޓޯ މައުރަޒު މީގެ ކުރިން މާލޭގައި ބާއްވާފައިވާ ކަމަށާއި ކުޅުދުއްފުށީގެ އިތުރުން ދެކުނުގެ ރަށެއްގައި މި މައުރަޒު އަދި ބާއްވާނެ ކަމަށެވެ.

މި މައުރަޒު މާދަމާ ހެނދުނުން ފެށިގެން ހަވީރު ހަޔަކަށް އަދި ރޭގަނޑު އަށަކުން 10:30 އަށް ގައުމީ އިދާރާގެ ހޯލުގައި ކުރިއަށް ދާނެ ކަމަށް މައުރަޒު އިންތިޒާމު ކުރާ ފަރާތުން މައޫލޫމާތު ދެއެވެ.