މާލޭގެ ސްކައުޓު ހަރަކާތާ އަޅާބަލާއިރު “ފަސްޓު ހދ ސްކައުޓު” ހަރަކާތަކީ އެއްވަނަ: އިންޓަރނޭޝަނަލް ކޮމިޝަނަރ

މާލޭގެ ސްކައުޓު ހަރަކާތާއި އަޅާބަލާއިރު “ފަސްޓު ހދ ސްކައުޓު” ހަރަކާތަކީ އެއްވަނަ އަދި އެންމެ ފުރިހަމަ ސްކައުޓު ހަރަކާތް ކަމަށް ސްކައުޓު އެސޯސިއޭޝަންގެ އިންޓަރނޭޝަނަލް ކޮމިޝަނަރ ހުސައިން އަބްދުﷲ ވިދާޅުވެއްޖެ އެވެ.

އެބޭފުޅާ މިހެން ވިދާޅުވީ ހދ އަތޮޅު ތައުލީމީ މަރުކަޒުގެ ސްކައުޓުންނާއި ކަބްސްކައުޓުން ހުވާކުރުމުގެ ރަސްމިއްޔާތުގައި ރޭ ވާހަކަ ދައްކަވަމުންނެވެ. އިންޓަރނޭޝަނަލް ކޮމިޝަނަރ ވަނީ ހދ ސްކައުޓުން ހޯދަމުންދާ ކާމިޔާބުތަކާއި ހދ އަތޮޅު ތައުލީމީ މަރުކަޒުގައި މި ހަރަކާތް ކުރިއަށްދާގޮތުގެ ފުރިހަމަ ކަމަށް ތައުރީފުކޮށް ވާހަކަ ދައްކަވާފައެވެ.

ރޭ ހދ އަތޮޅު ތައުލީމީ މަރުކަޒުގެ ހޯލުގައި ކުރިއަށްދިޔަ މި ރަސްމިއްޔާތުގައި އަލަށް ކަބްސްކައުޓާ ގުޅުނު 26 ދަރިވަރުންނަށް ހުވާލައިދެއްވީ ސްކައުޓު ލީޑަރ ޝަހީދާ ހަސަންއެވެ. އަދި އަލަށް ސްކައުޓާ ގުޅުނު 22 ދަރިވަރުންނަށް ހުވާލައިދެއްވީ ސްކައުޓު ލީޑަރ އަހުމަދު އަބްދުﷲ އެވެ. ހުވާކުރި ކަބްސް ކައުޓުންނަށް ސްކޫލުގެ ޕްރިންސިޕަލް ޒިޔާދު ރަޝާދު ސްކާފު ހަވާލުކޮށްދެއްވިއިރު ސްކައުޓުންނަށް ސްކާފް ހަވާލުކޮށްދެއްވީ ޑެޕިއުޓީ ޕްރިންސިޕަލް ހަފީޒާ އަބްދުއްރަހުމާނެވެ.

ރޭގެ ރަސްމިއްޔާތުގައި ސްރީލަންކާގެ ކެންޑީގެ ދަރުމަރާޖާ ކޮލެޖްގެ “ފަސްޓް ކެންޑީ ދަރުމަރާޖާ ސްކައުޓް ގުރޫޕް” އަށް 100 އަހަރު ފުރުން ފާހަގަ ކުރުމުގެ ގޮތުން ބޭއްވި ބައިނަލްއަގްވާމީ ސްކައުޓް ޖަމްބޮރީގައި ބައިވެރިވި ފަސްޓު ހދ ސްކައުޓް ގުރޫޕުގެ 11 ސްކައުޓުންނަށާއި ލީޑަރ އަހުމަދު ފަހީމަށް ވަނީ ހަނދާނީ ލިޔުން ހަވާލުކޮށްފައެވެ.

އަލަށް ސްކައުޓު ޝޭސް ހޯދި 5 ދަރިވަރުންނަށާއި ސްކައުޓު ކޯޑު ހަވާލުކުރި ދަރިވަރަށް އެތަކެތި ހަވާލުކޮށް ދެއްވީ ޝަރަފުވެރި މެހެމާނު ގައުމީ ޔުނިވަރސިޓީގެ ލެކްޗަރަރ މުހައްމަދު ހުސައިންއެވެ. އަދި ބްރޯންޒް އެރޯ ހޯދި 16 ދަރިވަރުންނަށާއި ސިލްވަރ އެރޯ ހޯދި 5 ދަރިވަރުންނަށް އެތަކެތި ހަވާލުކޮށްދެއްވީ ވުޑް ބެޖުގެ ލީޑަރ މޫމިނާ އިބްރާހީމެވެ.

ރޭގެ ހުވާކުރުމުގެ ރަސްމިއްޔާތުގައި ޝަރަފުވެރި މެހެމާނު ދެއްކެވި ވާހަކައިގައި ސްކައުޓު ހަރަކާތަކީ ވަރަށް ބޭނުންތެރި ހަރަކާތެއްކަން ފާހަގަކޮށް އޭގެ ފައިދާތަކަށް ވަނީ އަލި އަޅުވާލާފައެވެ. މީގެ އިތުރުން ސްކޫލުގެ ޕްރިންސިޕަލް ޒިޔާދު ރަޝާދުގެ ވާހަކައިގައިވެސް ސްކައުޓް ހަރަކާތުގެ މުހިއްމުކަން ފާހަގަ ކުރައްވާފައެވެ. އަދި ސްކޫލުގައި މިފަދަ ހަރަކާތެއްގައި ނޫޅޭ ދަރިވަރުންނަށްވެސް ބޭނުންތެރި ޕްރޮގްރާމުތަކެއް ހިންގުމަށް ވިސްނަމުންދާ ކަމަށް ޒިޔާދު ވިދާޅުވި އެވެ.

ރޭގެ ރަސްމިއްޔާތުގައި ސްކައުޓުން ބޮޑުބެރުގެ ހަރަކާތެއްވެސް ދައްކާލާފައެވެ.

އަލަށް ހުވާކުރި މި ދަރިވަރުންނާއެކު މިހާރު ހދ އޭއީސީގައި 66 ކަބްސްކައުޓުންނާއި 58 ސްކައުޓުން އެބަތިއްބެވެ. ރޭގެ ރަސްމިއްޔާތަށް ސްކައުޓުންނާއި ކަބްސްކައުޓުންގެ ބައިވެރިވުމާއެކު ސްކޫލު ވަރަށް ބޮޑަށް ޒީނަތްތެރި ކޮށްފައިވާކަން ފާހަގަކޮށްލެވެ އެވެ. ރޭގެ ރަސްމިއްޔާތުގައި ސްކައުޓުން ބޮޑުބެރުގެ ހަރަކާތެއްވެސް ވަނީ ދައްކާލާފަ އެވެ.