ނުކުޅެދުންތެރިކަން ހުންނަ ކުދިންނަށް އަމާޒުކޮށްގެން ބޭއްވި ހަވީރުން ހަތްހާހެއްހާ ރުފިޔާ ހޯދައިފި

ނުކުޅެދުންތެރިކަން ހުންނަ ކުދިންނަށް އަމާޒުކޮށްގެން ފަންޑު ރައިޒް ކުރުމަށް ބޭއްވި ކުޑަކުދިންގެ ހަވީރުން ހަތްހާހެއްހާ ރުފިޔާ ލިބިފައިވާ ކަމަށް އިންތިޒާމުކުރި ފަރާތުން ބުނެފި އެވެ.

އިއްޔެ ހަވީރު ކުޅުދުއްފުށީ ހިއްކި ސަރަހައްދުގައި އޮތް މި ކުޑަކުދިންގެ ހަވީރުގެ ފަންޑު ފޮށި ހުޅުވައިދެއްވީ ހދ އަތޮޅު ކައުންސިލްގެ ނޮޅިވަރަމް ދާއިރާގެ މެމްބަރު ޒަކަރިއްޔާ ހަސަން އެވެ. އެސަރަހައްދުގައި ހުންނަވައިގެން މިނޫހަށް ދެއްވި އިންޓަވިއުއެއްގައި ޒަކަރިއްޔާ ވިދާޅުވީ ޚާއްސަ އެހީއަށް ބޭނުންވާ ކުދިންނަކީ ވެސް ހުނަރުތަކެއް ލިބިފައިވާ ކުދިންތަކެއް ކަމަށާއި އެކުދިންނަކީ ބޭނުންތެރި ކުދިބަޔަކަށް ހެދުމަށް މިފަދަ ފަންޑްރައިޒިން އެކްޓިވިޓީތައް ވަރަށް މުހިއްމު ރޯލެއް އަދާކުރާ ކަމަށެވެ.

އިއްޔެގެ ކުޑަކުދިންގެ ހަވީރުގައި ބެހެއްޓި ފަންޑު ފޮށިތަކުން ލިބުނީ ޖުމްލަ 6986.50 ރުފިޔާ އެވެ.

އެސަރަހައްދުގައި ބެހެއްޓި 4 ފަންޑު ފޮށިން ލިބުނު ފައިސާ ކުޅުދުއްފުށީގެ ނުކުޅެދުންތެރިކަން ހުންނަ 108 ކުދިންނަށް އިއްޔެ ހަވީރު ވަނީ ދީފައި އެވެ.

ހދ ފެމިލީ އެންޑް ޗިލްޑްރެންސް ސާވިސް ސެންޓަރާއި ހދ އަތޮޅު ކައުންސިލާއި ދިރާގާއި ރަށުގެ އަމިއްލަ ޖަމިއްޔާތަކާއި ކުޅުދުއްފުށީ ޕޮލިސް ސްޓޭޝަނާ ގުޅިގެން ކުރިއަށްގެންދިޔަ މި ހަވީރުގައި ގިނަ އަދަދެއްގެ ޚާއްސަ އެހީއަށް ބޭނުންވާ ކުދިން ވަނީ ބައިވެރިވެފައެވެ.

މިހަވީރުގައި ކުދިން ސްޓޯލްތަކަށް ޒިޔާރަތް ކުރި ވަގުތުތަކުގައި ޑީއެލްޑީގެ ލައިވް މިއުޒިކު ވަނީ ހުށަހަޅައި ދީފައެވެ.